ពោធិ៍សាត់: នារីម្នាក់ សល់តែ១សប្ដាហ៍ទៀត នឹងដល់ថ្ងៃចូលរោងការ បានស្លាប់បាត់បង់ជីវិត ដោយសារគ្រូពេទ្យប្រចាំភូមិស្វាយយាង ស្រុកកណ្ដៀង ខេត្តពោធិ៍សាត់ ចាក់ថ្នាំ និងព្យួសេរ៉ូម ខណ:ដែលនារីរងគ្រោះមានអាការ:ចុកពោះខ្លាំង ហើយបានស្លាប់តាមផ្លូវ ពេលក្រុមគ្រួសារដឹកបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់។
លោក លីវ សេងហ៊ីម អធិការនគរបាលស្រុកកណ្ដៀងឲ្យដឹងថា នារីរងគ្រោះ ដែលស្លាប់ ដោយសារគ្រូពេទ្យប្រចាំភូមិម្នាក់ ចាក់ថ្នាំ និងព្យួសេរ៉ូមនោះមានឈ្មោះ ឡៃ ពុទ្ធី អាយុ៣២ឆ្នាំ រស់នៅភូមិស្វាយយាង ឃុំស្វាយលួង ស្រុកកណ្ដៀង ខេត្តពោធិ៍សាត់។ ចំណែកគ្រូពេទ្យមានឈ្មោះ តាន់ គឹមភាវ ភេទប្រុស អាយុ៦៣ឆ្នាំ រស់នៅភូមិស្វាយយាង ឃុំកណ្ដៀង ស្រុកកណ្ដៀង ខេត្តពោធិ៍សាត់។
លោកអធិការបន្តទៀតថា មុនពេលកើតហេតុ នារីរងគ្រោះមានអាការ:ចុកពោះខ្លាំង ទើបហៅគ្រូពេទ្យខាងលើមកព្យាបាល ពេលនោះគ្រូពេទ្យបានចាក់ថ្នាំ និងព្យួសេរ៉ូម ស្រាប់តែនារីរងគ្រោះហាក់ដូចជាមិនស្រួលខ្លាំង ទើបក្រុមគ្រួសារសម្រេចបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្តពោធិ៍សាត់ ប៉ុន្តែអកុសលនារីរងគ្រោះបានដាច់ខ្យល់ស្លាប់តាមផ្លូវបាត់ទៅហើយ៕
មតិយោបល់