កំពង់ធំ : មនុស្សម្នាក់ បានស្លាប់ស្ដូកស្ដឹងនៅនឹងកន្លែងកើតហេតុ និងម្នាក់ទៀតបានស្លាប់ពេលបញ្ជូនដល់មន្ទីរពេទ្យ ដោយសាររថយន្តក្រុងដឹកភ្ញៀវទេសចរបើកបរយ៉ាងលឿង ហើយជ្រុលចង្កូតបុកជាមួយម៉ូតូ C125 មួយគ្រឿងពេញទំហឹង កាលពីវេលាម៉ោង១រសៀលថ្ងៃទី១៩ ខែធ្នូ ឆ្នាំ២០១៦ នៅចំណុចមុខវិទ្យាល័យ ហ៊ុន សែនបល្ល័ង្គ ផ្លូវជាតិលេខ៦ ភូមិបល្ល័ង្គលិច សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
ប្រភពពីអ្នកឃើញហេតុការណ៍បានប្រាប់សមត្ថកិច្ចឲ្យដឹងថា នៅមុនពេលកើតហេតុគេឃើញរថយន្តបង្កម៉ាកហ៊ីយិនដាយ ពណ៌ក្រហម ស្លាកលេខ ភ្នំពេញ 3D-4365 ដឹកភ្ញៀវចេញពីរាជធានីភ្នំពេញ ទៅកាន់ខេត្តសៀមរាប ក្នុងល្បឿនយ៉ាងលឿន លុះមកដល់ចំណុចកើតហេតុ បានបុកជាមួយម៉ូតូ C125 ស៊េរី2014 ពណ៌ខ្មៅ ស្លាកលេខ កំពង់ធំ 1D-7050 ក្នុងទិសដៅបញ្ច្រាសទិសគ្នាយ៉ាងពេញទំហឹង អូសម៉ូតូចម្ងាយប្រហែល២០ម៉ែត្រ បណ្តាលឱ្យអ្នកជិះម៉ូតូ២នាក់ស្លាប់។
សមត្ថកិច្ចបានឲ្យដឹងថា អ្នកបើកបររថយន្តក្រុងឈ្មោះ ថោង ប៊ុនណារិទ្ធ ភេទប្រុស អាយុ៥០ឆ្នាំ ភូមិចុងកោះ ឃុំកោះឧញ្ញាតី ស្រុកខ្សាច់កណ្តាល ខេត្តកណ្តាល។ ចំណែកអ្នកបើកម៉ូតូឈ្មោះ ភា ម៉ិក ភេទប្រុស អាយុ៣៥ឆ្នាំ ភូមិប្រម៉ាត់ដី សង្កាត់ស្រយ៉ូវ ក្រុងស្ទឹងសែន មុខរបរធ្វើស្រែ បានស្លាប់ពេលបញ្ជូនទៅមន្ទីរពេទ្យ និងអ្នករួមដំណើរឈ្មោះ ប្លង់ សុផាន់ណា ភេទប្រុស អាយុ៥០ឆ្នាំ រស់នៅភូមិប្រមាត់ដី សង្កាត់ស្រយ៉ូវ ក្រុងស្ទឹងសែន មុខរបរធ្វើស្រែ និងជាអតីតយុទ្ធជនពិការ បានស្លាប់នៅកន្លែងកើតហេតុ។
សមត្ថកិច្ចបានបញ្ជាក់ថា មូលហេតុដែលបង្កឲ្យមានគ្រោះថ្នាក់នេះ គឺបើកបរមិនប្រកាន់ស្តាំ រថយន្តចូលគន្លងផ្លូវអាទិភាពម៉ូតូ។
ក្រោយកើតហេតុលោកព្រះរាជអាជ្ញា អ៊ិត សុធា បានបញ្ជាឲ្យឃាត់ខ្លួនអ្នកបើកបររថយន្តក្រុង រួចប្រគល់ឲ្យការិយាល័យចរាចរណ៍ខេត្តកំពង់ធំ ដើម្បីកសាងសំណុំរឿងចាត់ការបន្តតាមផ្លូវច្បាប់៕
មតិយោបល់