កោះកុងៈ កម្លាំងអធិការស្រុកមណ្ឌលសីមានៃស្នងការដ្ឋាននគរបាលខេត្តកោះកុង បង្ក្រាបបានករណីគ្រឿងញៀន១កន្លែង ដោយឃាត់ខ្លួនជនសង្ស័យបាន២នាក់ កាលពីវេលាម៉ោង២និង៤៥នាទី ថ្ងៃទី១៩ ខែធ្នូ ឆ្នាំ២០១៦ នៅត្រង់ចំណុចភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង។

សមត្ថកិច្ចបានឲ្យដឹងថា ក្នុងប្រតិបត្តិការនេះ ឃាត់ខ្លួនជនសង្ស័យចំនួន២នាក់ ទី១. ឈ្មោះ ដា បឿន ភេទប្រុស អាយុ២៧ឆ្នាំ មុខរបរមិនពិតប្រាកដ មានទីលំនៅភូមិចាំយាម ឃុំប៉ាក់ខ្លង ស្រុកមណ្ឌលសីមា ខេត្តកោកុង ទី២. ឈ្មោះ វ៉ាន់ គីរី ភេទប្រុស អាយុ៣៥ឆ្នាំ មុខរបរមិនពិតប្រាកដ មានទីលំនៅភូមិឃុំខាងលើ។ និងដកហូតវត្ថុតាងបានរួមមាន ដែកកេះចំនួន២គ្រឿង ឧបករណ៍សំរាប់ជក់ចំនួន១ ទុយយោជ័រតូចៗមួយចំនួន។

បច្ចុប្បន្ន ជនសង្ស័យ រួមទាំងវត្ថុតាង ត្រូវបានបញ្ជូនទៅស្នងការដ្ឋាននគរបាលខេត្តដើម្បីកសាងសុំរឿងបញ្ជូនបន្តទៅសាលាដំបូងខេត្ត៕