ប៉ោយប៉ែត: មន្ត្រីនគរបាលរងអន្តោប្រវេសន៍ច្រកប៉ោយប៉ែត បានរងគ្រោះរបួសធ្ងន់ ក្រោយពីប្រធានសមាគមសេដ្ឋកិច្ចក្រៅប្រព័ន្ធម្នាក់ បើករថយន្តឡិចស៊ីសបំបុកវេលាម៉ោង១០និង៣០នាទីថ្ងៃទី២២ ខែធ្នូ ឆ្នាំ២០១៦ នៅចំណុចក្បាលស្ពានច្រក ព្រំដែនកម្ពុជាថៃ ក្រុងប៉ោយប៉ែត។
តាមប្រភពពីមន្រ្តីនគរបាលបានឲ្យដឹងថា ជនបង្កមានឈ្មោះ ឌិន ពុទ្ធិ ជាប្រធានសមាគមសេដ្ឋកិច្ចក្រៅប្រព័ន្ធ។ ចំណែកជនរងគ្រោះឈ្មោះ ពីសិទ្ធ ជាមន្ត្រីនគរបាលរងអន្តោប្រវេសន៍ច្រកក្រុងប៉ោយប៉ែត។
ប្រភពព័ត៌មានបានបន្តឲ្យដឹងទៀតថា នៅមុនពេលបង្កកើតហេតុ បក្ខពួកម៉ូតូឌុបរបស់ជនបង្កមានសភាពរញេរញៃ ហើយជនរងគ្រោះ ក៏បានហាមឃាត់ ពេលនោះជនបង្កមកដល់ ក៏បានឲ្យអ្នករត់ម៉ូតូឌុបឡើងរថយន្តម៉ាក LEXUS RX300 ពណ៌ស្ករ ពាក់ស្លាកលេខ បន្ទាយមានជ័យ 2.A 5484 ប៉ុន្តែជនរងគ្រោះឃាត់ ឲ្យចុះមកនិយាយគ្នា តែពួកគេមិនព្រម ជនរងគ្រោះបានព្យាយាមរារាំភាគីខាងរថយន្តឲ្យឈប់ និងឈរពាំងឡាន ទើបជនបង្កបើកបំបុក បណ្ដាលឲ្យជនរងគ្រោះរងរបួស ត្រូវបានដឹកបញ្ជូនទៅកាន់មន្ទីរពេទ្យអារញប្រថេតប្រទេសថៃ។
ដោយឡែកយោងតាមប្រភពពីអ្នកឃើញហេតុការណ៍បានឲ្យដឹងថា រថយន្តខាងលើ មិនបានបើកបុកជនរងគ្រោះនោះទេ គឺឃើញតែជនរងគ្រោះដើរទៅវិញទៅមកនៅមុខរថយន្ត ស្រាប់តែដួលតែម្ដង។ អ្នកឃើញហេតុការណ៍ដាក់ជាសំនួរថា “ពិតទេ មន្រ្តីគរបាលរងអន្តោប្រវេសន៍ច្រកអន្តរជាតិប៉ោយប៉ែត ត្រូវរថយន្តបុកនោះ?”
ក្រោយកើតហេតុ រថយន្តបង្ក ត្រូវបានកម្លាំងនគរបាលអន្តោប្រវេសន៍ច្រកទ្វារយកទៅរក្សាទុកនៅប៉ុស្តិ៍នគរបាលអន្តោប្រវេសន៍ មិនប្រគល់ឲ្យនគរបាលប៉ុស្តិ៍រដ្ឋបាលនោះទេ៕
មតិយោបល់