ភ្នំពេញ៖ នៅក្រោយពេលដែលលោក គង់ ដារ៉ាឆាត ចៅក្រមតុលាការកំពូលប្រកាសសាលដីកាឱ្យលោកយាយ យិន គន្ធារី ចាញ់ក្តីឈ្មោះ ប្រាក់ ហម ដោយរក្សាទុកសេចក្តីសម្រេចរបស់សាលាឧទ្ធរណ៍ទុកជាបានការនិងច្រានចោលបណ្តឹងសារទុក្ខរបស់លោកយាយនៅព្រឹកថ្ងៃទី២២ ខែធ្នូ ឆ្នាំ២០១៦នោះ។
លោកយាយ យិន គន្ធារី បានថ្លែងអំពាវនាវសុំការអន្តារគមន៍ពីសម្តេចតេជោ និងសម្តេចកិត្តិព្រឹទ្ធបណ្ឌិត ដើម្បីឱ្យលោកយាយទទួលបានភាពយុត្តិធម៌ និងបានរស់នៅលើដីរបស់លោកយាយនាជីវិតចុងក្រោយ។
លោកយាយបានបញ្ជាក់ប្រាប់ក្រុមអ្នកកាសែតថា លោកយាយបានទិញដីទំហំ ១០៨០២,៥ ម៉ែត្រការ៉េ ស្ថិតនៅភូមិ២ សង្កាត់លេខ២ ក្រុងព្រះសីហនុ ខេត្តព្រះសីហនុពីលោកស្រី គឹម ទេម និងក្រុមគ្រួសារ ក្នុងតម្លៃ ៣ជីមាស នៅថ្ងៃទី១៧ ខែមិថុនា ឆ្នាំ១៩៩១។
លោកយាយបានកាន់កាប់ និងអាស្រ័យផលលើដីនោះតាំងពីឆ្នាំ១៩៩១ រហូតដល់ឆ្នាំ២០០៤ ទើបមានមន្ត្រីថ្នាក់ជាតិចុះទៅវាស់វែងដើម្បីធ្វើប្លង់កាន់កាប់ ឱ្យលោកយាយ និងបានបិទប្រកាសត្រឹមត្រូវតែគ្មានអ្នកតវ៉ាអ្វីនោះទេ លុះដល់ឆ្នាំ២០០៨ ទើបមន្ត្រីសុរិយោដីប្រាប់លោកយាយថា ដីនោះគេមិនចេញប្លង់ឱ្យទេ ព្រោះមានឈ្មោះ ប្រាក់ ហម ជាអ្នកជំទាស់។
ដោយសារតែលោកយាយជាម្ចាស់ដីនោះស្របច្បាប់ ទើបនៅខែធ្នូ ឆ្នាំ២០១៦ តុលាការខេត្តព្រះសីហនុ បានសម្រេចឱ្យលោកយាយឈ្នះក្តី។ ក្រោយពីលោកយាយឈ្នះនៅតុលាការថ្នាក់ក្រោមរួចមក ភាគីឈ្មោះ ប្រាក់ ហម បានប្តឹងមកសាលាឧទ្ធរណ៍ ស្រាប់តែរឿងនេះប្រែជាលោកយាយចាញ់ ហើយប្តឹងរហូតដល់តុលាការកំពូលក៏លោកយាយចាញ់ទៀត ទើបលោកយាយមិនអស់ចិត្ត មានតែសុំអង្វរឱ្យសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតជួយរកយុត្តិធម៌ជូនលោកយាយផង។
លោក ពេជ្រ សូរិយា មេធាវីការពារសិទ្ធិលោកយាយ យិន គន្ធារី បានថ្លែងថា សេចក្តីសម្រេចរបស់តុលាការកំពូលដែលឱ្យកូនក្តីលោកចាញ់ និងប្រគល់ដីទំនាស់ឱ្យទៅឈ្មោះ ប្រាក់ ហម នេះហាក់ ទទួលស្គាល់ប័ណ្ណកម្មសិទ្ធិដែលខុសច្បាប់ ហេតុដែលលោកយល់ថាវាជារឿងខុសច្បាប់ដោយសារ៖
១- ភាគីលោក ប្រាក់ ហម មិនបានប្តឹងទាស់តាមកំណត់ច្បាប់រយៈពេល៣០ថ្ងៃ នៅពេលដែលអាជ្ញាចុះអង្កេតវាស់វែងធ្វើប្លង់ដីជូនកូនក្តីលោកទេ
២- ប័ណ្ណសម្គាល់កម្មសិទ្ធិដីរបស់ឈ្មោះ ប្រាក់ ហម គឺនៅចំណុចឃ្លាំងលើ សង្កាត់លេខ១ ចំណែកដីរបស់លោកយាយ គឺនៅចំណុចវត្តលើ សង្កាត់លេខ២
៣- ទំហំដីរបស់លោក ប្រាក់ ហម ចំនួនពីរប័ណ្ណគឺមាន ជិត៥ហិកតា ចំណែកដីលោកយាយមានតែ ជាង១ហិកតា ដូច្នេះ បើតុលាការកាត់ឱ្យដីរបស់លោកយាយ ឱ្យទៅឈ្មោះ ប្រាក់ ហម តើតុលាការបានដីមកពីណាដើម្បីបង្គ្រប់
លោកមេធាវីដដែលបន្តថា ករណីនេះគឺមានភាពមិនប្រក្រតីនោះទេ ដោយសារតែប័ណ្ណកម្មសិទ្ធិដីរបស់ឈ្មោះ ប្រាក់ ហម ច្បាប់ដើមមិនត្រូវបានគេបញ្ចេញមកបង្ហាញតុលាការ និងភាគីកូនក្តីលោកនោះទេ ពោលគឺកាត់ក្តីនេះប្រើតែប្លង់កូពី ។
ម្យ៉ាងទៀត ភាពមន្ទិលសង្ស័យបំផុតនោះគឺ ថ្ងៃអង្កេតវាស់វែងដីធ្លី និងថ្ងៃចេញប័ណ្ណកម្មសិទ្ធិឱ្យទៅឈ្មោះ ប្រាក់ ហម គឺមានកាលបរិច្ឆេទដូចគ្នា ដែលនេះជារឿងចម្លែកបំផុតដែល អាជ្ញាធរសុរិយោដី ចុះវាស់ថ្ងៃតែមួយ ជាមួយថ្ងៃចេញប្លង់កម្មសិទ្ធិ ដែលនៅក្នុងផ្លូវច្បាប់វាមិនអាចទៅរួចនោះទេ លោកហៅថា នេះជាប្លង់ដីដែលគេអង្គុយគូនៅក្នុងការិយាល័យ មិនមែនប្លង់ដែលគេទៅវាស់លើដីទេ។
លោក ពេជ្រ សូរិយា បញ្ជាក់ថា លោក និងកូនក្តី នឹងបន្តប្តឹងសើរើសំណុំរឿងនេះថែមទាំងប្តឹងទៅស្ថាប័នមានសមត្ថកិច្ចឱ្យពិនិត្យឡើងវិញលើប័ណ្ណកម្មសិទ្ធិដីរបស់ឈ្មោះ ប្រាក់ ហម នោះ ដើម្បីស្វែងរកយុត្តិធម៌ជូនកូនក្តីលោក។
យើងមិនអាចសុំការបំភ្លឺពីភាគីលោក ប្រាក់ ហម បានទេដោយសារតែលោកមិនបានចូលរួមស្តាប់ការប្រកាសសាលដីកានោះទេ៕
ទស្សនាវីដេអូឃ្លិបដូចខាងក្រោមនេះ៖
https://www.youtube.com/watch?v=WHKFc7RD18c&feature=youtu.be
មតិយោបល់