ភ្នំពេញ៖ ជនសង្ស័យ ២នាក់ ត្រូវសមត្ថកិច្ចខណ្ឌ សហការជាមួយសមត្ថកិច្ចប៉ុស្តិ៍ស្វាយប៉ាក ឆ្មក់ចូលបង្ក្រាបទីតាំងជួញដូរ និងចែកចាយគ្រឿងញៀន មួយកន្លែង កាលពីវេលាម៉ោង ៤និង៣០នាទីល្ងាច ថ្ងៃទី២៦ ខែធ្នូ ឆ្នាំ២០១៦ នៅចំណុចផ្ទះគ្មានលេខ ស្ថិតក្នុងភូមិឡេកំបោរ សង្កាត់ស្វាយប៉ាក ខណ្ឌឬស្សីកែវ។
សមត្ថកិច្ចបានឲ្យដឹងថា ជនសង្ស័យទី១-ឈ្មោះ ចេង ណារី ភេទស្រី អាយុ ៥៣ឆ្នាំ មុខរបរ លក់ដូរ និងទី២-ឈ្មោះ កោ ពិសិដ្ឋ ភេទប្រុស អាយុ ១៥ឆ្នាំ មុខរបរ មិនពិតប្រាកដ បច្ចុប្បន្នអ្នកទាំង ២នាក់ ស្នាក់នៅកន្លែងកើតហេតុខាងលើ។
សមត្ថកិច្ចបានបន្តទៀតថា ជនសង្ស័យទាំង ២នាក់ខាងលើនេះ កម្លាំងសមត្ថកិច្ចយើងបានធ្វើការស្រាវជ្រាវរយៈពេលជាច្រើនថ្ងៃមកហើយ ទើបនៅថ្ងៃនេះ កម្លាំងសមត្ថកិច្ចយើងបានឆ្មក់ចូលបង្ក្រាបទីតាំងខាងលើនេះ ហើយបានឃាត់ខ្លួនមនុស្សប្រុសស្រី ២នាក់ និងបានដកហូតម្សៅក្រាមពណ៌សថ្លា ចំនួន ២១កញ្ចប់ ជាប្រភេទ ម៉ាទឹកកក និងនាំយកទៅអធិការដ្ឋាននគរបាលខណ្ឌ ដើម្បីធ្វើការសាកសួរបន្ត។
ក្រោយពីសមត្ថកិច្ចបានសាកសួររួច ជនសង្ស័យខាងលើបានសារភាពថា ខ្លួនពិតជាបានជួញដូរ និងចែកចាយគ្រឿងញៀនពិតប្រាកដមែន ដោយរូបខ្លួនលក់ក្នុងមួយកញ្ចប់តម្លៃ ២០០០០រៀលក្នុងនោះ មួយកញ្ចប់ចំណេញ ៤០០០រៀល។
បច្ចុប្បន្នជនសង្ស័យទាំង ២នាក់ខាងលើ រួមនឹងវត្ថុតាង ត្រូវសមត្ថកិច្ចឃុំខ្លួនជាបណ្តោះអាសន្ននៅអធិការដ្ឋាននគរបាលខណ្ឌឬស្សីកែវ ដើម្បីកសាងសំណុំរឿង បញ្ជូនទៅកាន់តុលាការចាត់ការបន្តតាមនិតិវិធីច្បាប់៕
ទស្សនាវីដេអូ៖
https://www.youtube.com/watch?v=DNzgr7jkXEg&feature=youtu.be
មតិយោបល់