ស្ទឹងត្រែង: នារីវ័យក្មេងម្នាក់ បាននាំក្មេងស្រីម្នាក់ទៀតមកជួយបេះផ្លែល្វាសុខៗ ស្រាប់តែរត់ទៅលោតទឹកទន្លេលេចបាត់រយ:ពេលជិត៥ម៉ោងមកហើយ នៅតែរកមិនទាន់ឃើញ។

ហេតុការណ៍នេះបានកើតឡើងកាលពីវេលាម៉ោងជាង១០ព្រឹកថ្ងៃទី៩ ខែមករា ឆ្នាំ២០១៧ ត្រង់ចំណុចទល់មុខសាលា ស្រុកសេសាន ស្ថិតក្នុងភូមកំភុន ឃុំកំភុន ស្រុកសេសាន ខេត្តស្ទឹងត្រែង។

បើតាមសំដីអ្នករស់នៅក្នុងភូមិជាមួយបាននិយាយប្រាប់ post newsថា មុនពេលកើតហេតុនារីរងគ្រោះបានបបួលក្មេងស្រីម្នាក់ជិះម៉ូតូមួយគ្រឿងមកជាមួយ ដើម្បីជួយដើររកបេះផ្លែល្វា​យកទៅហូបជាមួយម្ជូរ លុះដើររកបេះអត់បាន នារី​រងគ្រោះស្រាប់តែឲ្យ​សោម៉ូតូទៅក្មេងស្រីដែលមកជាមួយ រួចរូបគេក៏បានរត់ចុះទឹកទន្លេបាត់ខ្លួនរហូតមក ភ្លាមនោះក្មេងស្រីដែល​មកជាមួយក៏បានរត់ទៅប្រាប់អ្នកភូមិក្បែរនោះ ធ្វើឲ្យ​ផ្អើលឆោឡោនាំគ្នាជួយតាមរកពេញទន្លេ ប៉ុន្តែរយ:ពេលប្រហែលជា៥ម៉ោងមកហើយនៅតែមិនទាន់រកឃើញ។

នារីរងគ្រោះឈ្មោះ ថងថេង ជីឡា ជនជាតិឡាវ អាយុប្រហែល១៧ឆ្នាំរស់នៅភូមិឃុំ ខាងលើ។

បច្ចុប្បន្ន សពនារីរងគ្រោះត្រូវបានអ្នកភូមិតាមរកមិនទាន់ឃើញឡើយ៕