ក្នុងកិច្ចប្រជុំបូកសរុបលទ្ធផលត្រួតពិនិត្យរឹតបណ្តឹងអនុវត្តច្បាប់ស្តីពីចរាចរណ៍ផ្លូវគោកថ្មីប្រចាំខែនៅទីស្តីការក្រសួងមហាផ្ទៃ បានបង្ហាញថា កាលពី រសៀល ថ្ងៃទី៥ ខែឧសភា ឆ្នាំ២០១៦ គ្រោះថ្នាក់ចរាចរណ៍ក្នុង ខែមេសាឆ្នាំ២០១៦នេះ បានកើតឡើងចំនួន៣៥៨លើក បណ្តាលឲ្យមនុស្សស្លាប់១៨៧នាក់ និងរបួស ៧៣០នាក់។ បើប្រៀបធៀបទៅនឹងរយ:ពេលដូចគ្នាក្នុងឆ្នាំ២០១៥ គ្រោះថ្នាក់ថយចុះចំនួន ៩៩លើក ហើយចំនួនអ្នកស្លាប់ថយចុះ២៣នាក់ និងអ្នករបួសថយចុះចំនួន១៣៥នាក់។

លោក គៀត ច័ន្ទថារិទ្ធ អគ្គស្នងការរងនគរបាលជាតិ បានមានប្រសាសន៍ថា គ្រោះថ្នាក់ដែលបណ្តាលឲ្យមនុស្សស្លាប់ចំនួន១៨៧នាក់ និងរបួស៧៣០នាក់ ភាគច្រើនកើតឡើងនៅរាជធានីភ្នំពេញចំនួន ២៩លើកខេត្តបាត់ដំបងចំនួន២៧លើក និងខេត្តព្រៃវែង ចំនួន២៤លើក។

លោកបន្តថា មូលហេតុដែលបណ្តាលឲ្យមានគ្រោះថ្នាក់ដោយសារការបើកបរលើសល្បឿនកំណត់៤៥ភាគរយ មិនប្រកាន់ស្តាំ១៣ភាគរយ,មិនគោរពសិទ្ធិអាទិភាព១២ ភាគរយវ៉ាជែង១០ភាគរយ,ស្រវឹង៩ភាគរយ,បត់៧ភាគរយ,កត្តាយានយន្ត១ភាគរយ,ងងុយដេក២ភាគរយ,កត្តាយានយន្ត ២ភាគរយនិងកត្តាផ្សេងៗ១ភាគរយ។

លោក គៀត ច័ន្ទថារិទ្ធ បានបញ្ជាក់ថា ក្នុងចំណោមអ្នកស្លាប់សរុប១៨៧នាក់ភាគច្រើន ជាអ្នកជិះម៉ូតូមានចំនួន១៣៦នាក់ ស្មើ៧៣ភាគរយ (ប្រភេទ១២៥សេសេចុះក្រោម) ក្នុងនោះមិនពាក់មួកសុវត្ថិភាពមានចំនួន៦៨ភាគរយ។ ជាមួយនេះមានអ្នកថ្មើរជើងស្លាប់ចំនួន៩ភាគរយ។

សម្តេចក្រឡាហោម ស ខេង បានសំណូមពរដល់គ្រប់ស្ថាប័នទាំងអស់ត្រូវអប់រំមន្ត្រីឲ្យបានយល់ច្បាស់ពីច្បាប់ចរាចរណ៍ ដើម្បីចូលរួមកាត់បន្ថយគ្រោះថ្នាក់ចរាចរណ៍ទាំងអស់គ្នា ជាពិសេសអាណាព្យាបាលត្រូវអប់រំកូនចៅមុនពេលចេញដំណើរដោយម៉ូតូត្រូវពាក់មួកសុវត្ថិភាព ពីព្រោះថាអ្នកស្លាប់ភាគច្រើនជាអ្នកជិះម៉ូតូដែលមិនពាក់មួកសុវត្ថិភាព។ សម្តេចបានទទួល ស្គាល់នូវ ការថយចុះនៃគ្រោះថ្នាក់ចរាចរណ៍ ក្នុងខែមេសាឆ្នាំ២០១៦នេះ៕