បន្ទាយមានជ័យ ៖ អភិបាលខេត្តបន្ទាយមានជ័យ លោក សួន បវរ និង លោក ឡាយ គឹមលីសមាជិកយុវជនថ្នាក់កណ្តាលនិងជានាយករងខុទ្ទកាល័យឧបនាយករដ្ឋមន្ត្រី កែ គឹមយ៉ាន ព្រមទាំងក្រុមការងារថ្នាក់ខេត្ត នៅព្រឹកថ្ងៃទី០៣ខែមេសានេះបានចុះទៅពិនិត្យស្ថានភាពនិងសួរសុខទុក្ខប្រជាពលរដ្ឋដែលរងគ្រោះដោយខ្យល់កន្ត្រាក់ក្នុងឃុំទួលពង្រស្រុកម៉ាឡៃ។
លោក តាំង សុខហេង មេបញ្ជាការមូលដ្ឋានអាវុធហត្ថស្រុកម៉ាឡៃបានឲ្យpost newsដឹងថា មានប្រជាពលរដ្ឋចំនួន៣២គ្រួសារដែលរងគ្រោះដោយខ្យល់កន្ត្រាក់នៅក្នុងភូមិទួលប្រាសាទ ភូមិទួលពង្រនិងភូមិខ្លាងាប់ឃុំទួលពង្រ។ហើយនៅក្នុងហេតុការណ៍នោះដែរ បុរសម្នាក់ឈ្មោះ ស៊ី នួន អាយុ៦៧ឆ្នាំ រស់នៅភូមិទួលប្រាសាទបានរងគ្រោះថ្នាក់ដោយរន្ទះបាញ់ខណះកំពុងអង្គុយនៅក្រោមផ្ទះជាមួយចៅស្រីតែមិនបណ្តាលឲ្យបង់ជីវិតនោះទេគឺគ្រាន់តែឆេះរោលសក់និងហឹងត្រចៀក។សូមបញ្ជាក់ផងដែរថាផ្ទះមួយខ្នងក៏ត្រូវគ្រាប់រន្ទះដែលបុរសខាងលើផ្លាតត្រូវរយះបែកជាពីរផងដែរ។
ជួបជាមួយអ្នកយកពត៌មានលោក ម៉ាន់ ហេន អាយុ ៥៨ឆ្នាំ រស់នៅភូមិខ្លាងាប់បានរៀបរាប់ថា នៅមុនពេលកើតហេតុមេឃមានភាពខ្មៅងងឹតដោយរកកលភ្លៀង។មួយសន្ទុះក៏មានខ្យល់យ៉ាងខ្លាំងបោកបក់មកលើផ្ទះរបស់គាត់ ដោយគួចដំបូលបណ្តាលឲ្យរបើកស័ង្កសីទាំងស្រុងធ្លាក់មកដីសង្កត់លើរោងបាយ បែកចានឆ្នាំងនិងសម្ភារ:មួយចំនួន។
ថ្លែងសំណេះសំណាលនិងសួរសុខទុក្ខជាមួយប្រជាពលរដ្ឋនាឱកាសនោះលោក សួន បវរ បានពាំនាំនូវប្រសាសន៍ផ្តាំផ្ញើសួរសុខទុក្ខរបស់សម្តេចតេជោនាយករដ្ឋមន្ត្រីនិងសម្តេចគតិព្រឹទ្ធបណ្ឌឹតដែលជានិច្ចកាលលោកទាំងពីរតែងគិតគូរពីសុខទុក្ខរបស់ប្រជាពលរដ្ឋគ្រប់ទីកន្លែង។ជាមួយនោះលោកអភិបាលខេត្តបានថ្លែងអំណរគុណចំពោះកងកម្លាំងទាំងបីប្រភេទតែងចុះអន្តរាគមន៍រាល់សភាពការណ៍រងគ្រោះរបស់ប្រជាពលរដ្ឋបានទាន់ពេលវេលាពិសេសចូលរួមរាល់សកម្មភាពជួសជុលសាងសង់លំនៅដ្ឋានជូនពលរដ្ឋក្រីក្រតាមយុទ្ធសាស្ត្រកាត់បន្ថយភាពក្រីក្រនៅតាមមូលដ្ឋាន។
លោក សួន បវរ សម្តែងនូវការសោកស្តាយចំពោះការខូចខាតនិងបាត់បង់នូវទ្រព្យសម្បត្តិរបស់បងប្អូននឹងបានធ្វើការអំពាវដល់ប្រជាពលរដ្ឋទាំងអស់សូមបង្កើនការប្រុងប្រយត្ន័បន្ថែមទៀតសំរាប់សមាជិកក្រុមគ្រួសារពិសេសក្មេងៗមិនត្រូវឲ្យរត់លេងនិងជ្រកក្រោមដើមឈើនៅពេលមានភ្លៀងម្តងៗ។មិនតែប៉ុណ្ណោះសូមប្រុងប្រយត្ន័ចំពោះសុខភាព ត្រូវមានអនាម័យក្នុងការហូបចុក ផឹកទឹកឆ្អិននិងដេកក្នុងមុងជានិច្ច។
ជាមួយនោះលោកក៏បានឧបត្ថម្ភនូវសង្ក័សីចំនួន៥០០សន្លឹកបន្ថែមសំរាប់ជួសជុលផ្ទះដែលរងគ្រោះព្រមទាំងគ្រឿងឧបភោគបរិភោគនឹងថវិកាមួយចំនួនទៀត៕
មតិយោបល់