ភ្នំពេញ: បុរសម្នាក់បានស្លាប់បាត់បង់ជីវិតយ៉ាងអាណោចអាធ័ម ក្រោយពីបើកម៉ូតូក្នុងល្បឿនយ៉ាងលឿន ទៅបុកគូទរថយន្តឡិចស៊ីស ៥៧០ ដែលកំពុងតែឈប់ស្តុបបណ្តាលឲ្យស្លាប់ភ្លាមៗនៅនឹងកន្លែង។

ហេតុការណ៍នេះកើតឡើងនៅតាមបណ្តោយផ្លូវព្រះនរោត្តម សង្កាត់ផ្សារចាស់ ខណ្ឌដូនពេញ ត្រង់ចំណុចមន្ទីរពេទ្យ ព្រះអង្គឌួង រាជធានីភ្នំពេញ។

តាមប្រភពនៅកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសម្នាក់បើកម៉ូតូម៉ាក Majesty គ្មានស្លាកលេខ មួយគ្រឿង ក្នុងល្បឿនយ៉ាងលឿនទិសដៅពីជើងទៅត្បូង ក្នុងសង្កាត់ផ្សារចាស់ ខណ្ឌដូនពេញ លុះមកដល់ចំណុចកើតហេតុចំណុចស្តុបពេទ្យ ព្រះអង្គឌួង ក៏ចាប់ហ្រ្វាំងមិនទាន់ជ្រុលទៅបុកគូទរថយន្តម៉ាក ឡិចស៊ីស ៥៧០ ពណ៌ខ្មៅ មួយគ្រឿង ដែលកំពុងតែឈប់ស្តុបពេញទំហឹងបណ្តាលឲ្យបុរសដែលបើកម៉ូតូ Majesty ដួលបាក់កស្លាប់ភ្លាមៗនៅនឹងកន្លែងកើតហេតុ។ ចំណែកឯរថយន្ត ឡិចស៊ីស ៥៧០ ក៏បានបើកគេចចេញទៅបាត់ស្រមោល។

ក្រោយពីកើតហេតុ ភ្លាមៗនោះ សមត្ថកិច្ចនគរបាលមូលដ្ឋាន បានចុះមកដល់កន្លែងកើតហេតុ និងបានទូរសព្ទហៅសាច់ញាតិ មកទទួលយកសព ទៅធ្វើបុណ្យតាមប្រពៃណី៕