ភ្នំពេញៈ បើយោងតាមប្រភពពីសមត្ថកិច្ចបានឱ្យដឹងថា មានជនត្រូវចោទជាក្រុនចោរប្លន់កាំភ្លើងអាកាចំនួន៥នាក់ ក្នុងចំណោម៨នាក់ ដែលសមត្ថកិច្ចឃាត់ខ្លួនបាននោះ គឺជាអតីតអ្នកទោសដែលទើបតែចេញពីគុកបាន៣ខែ ពាក់ព័ន្ធបទល្មើសប្លន់ដូចគ្នា។ សមត្ថកិច្ចបញ្ជាក់ថា ក្រុមជនត្រូវចោទបានសារភាពថា រាល់ពេលប្លន់ម្តងៗ ពួកគេតែងតែបាញ់សម្លាប់ជនរងគ្រោះណាដែរហ៊ានតមាត់ ឬរឹងរួសមិនព្រមប្រគល់ទ្រព្យសម្បត្តិឱ្យពួកគេដោយស្រួលៗ។ ពេលពួកគេប្លន់នៅខណ្ឌពោធិសែនជ័យរួច ពួកគេដើរទៅចាំគ្នីគ្នាមកទទួលនៅម្តុំផ្លូវជាតិលេខ ៥១ នាខេត្តកំពង់ស្ពឺ និងសម្រាកនៅខេត្តកំពង់ស្ពឺនៅពេលថ្ងៃ ហើយពេលយប់បានត្រលប់មកភ្នំពេញវិញ។

សូមបញ្ជាក់ថា នៅរសៀលថ្ងៃទី១១ ខែមករា ឆ្នាំ២០១៧នេះលោក ប៊ុន ធី ចៅក្រមស៊ើបសួរសាលាដំបូងរាជធានីភ្នំពេញបានសម្រេចចេញដីកាឃុំខ្លួនជនត្រូវចោទជាក្រុមចោរប្លន់កាំភ្លើងអាកា ទាំង៨នាក់នោះហើយ ក្រោយពីលោកស្រី កែវ សុគន្ធា តំណាងអយ្យការបានថ្លែងថា លោកស្រីបានសម្រេចចោទជនសង្ស័យចំនួន ៨នាក់រួមមាន៖

១- ឈ្មោះ អ៊ី សោភ័ណ្ឌ ភេទប្រុស អាយុ៣៣ឆ្នាំ ទីលំនៅភូមិវត្តភ្នំ ឃុំភ្នំតូច ស្រុកឧដុង្គ ខេត្តកំពង់ស្ពឺ ។

២- ឈ្មោះ សាត ធីម ភេទប្រុស អាយុ៣៩ឆ្នាំ ទីលំនៅភូមិទួលតានាង ឃុំកែស្រទាប់ ស្រុកឱរ៉ាល់ ខេត្តកំពង់ស្ពឺ ។

៣- ឈ្មោះ ស្វាយ តាក់ ភេទប្រុស អាយុ៣៩ឆ្នាំ ទីលំនៅភូមិរាមកណ្តាល ឃុំវាលពន់ ស្រុកថ្ពង ខេត្តកំពង់ស្ពឺ ។

៤- ឈ្មោះ សួន ប៊ុនធឿ ភេទប្រុស អាយុ៣៦ឆ្នាំ ទីលំនៅភូមិដុំខ្វិត ឃុំវាលពន់ ស្រុកថ្ពង ខេត្តកំពង់ស្ពឺ ។

៥- ឈ្មោះ អឿន សុផា ភេទប្រុស អាយុ ៣៣ឆ្នាំ ទីលំនៅភូមិថ្មី ឃ៊ំត្រាចទង ស្រុកឧដុង្គ ខេត្តកំពង់ស្ពឺ ។

៦- ឈ្មោះ មាស ធីម ភេទប្រុស អាយុ ៣៦ឆ្នាំ ទីលំនៅភូមិប្រសប់ជុំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។

៧- ឈ្មោះ សួង ធី ភេទប្រុស អាយុ ៥៤ឆ្នាំ ទីលំនៅភូមិទួលរកា ឃុំស្អាងលើ ស្រុកកំពង់សៀម ខេត្តកំពង់ចាម។

៨- ឈ្មោះ ហម ហាន ភេទប្រុស អាយុ៤៥ឆ្នាំ ទីលំនៅភូមិព្រៃរឹង សង្កាត់ស្នោ ខណ្ឌពោធិសែនជ័យ រាជធានីភ្នំពេញ ពីបទប៉ុនប៉ងលួច យោងតាមមាត្រា ២៧ មាត្រា ៣៥៣ មាត្រា ៣៥៧ និងបទអំពើលួចមានស្ថានទម្ងន់ទោសដោយសារមរណៈភាពនៃជនរងគ្រោះ យោងតាមមាត្រា៣៦០នៃក្រមព្រហ្មទណ្ឌ។

យោងតាមរបាយការណ៍របស់សមត្ថកិច្ច ក្រៅពីជនត្រូវចោទចំនួន៨នាក់ខាងលើ ដែលត្រូវតំណាងអយ្យការសម្រេចចោទប្រកាន់នេះ នៅមានបក្ខពួកចំនួន ៣នាក់ទៀត ដែលកំពុងរត់គេចខ្លួនទី១ឈ្មោះ ភ័ណ្ឌ ទី២ឈ្មោះ រ៉ា និងទី៣ មិនទាន់ស្គាល់អត្តសញ្ញាណនៅឡើយ។

គួររំលឹកថា ក្រុមជនសង្ស័យ ៨នាក់ខាងលើត្រូវបានកម្លាំងនគរបាល​នៃនាយកដ្ឋានព្រហ្មទណ្ឌកម្រិតធ្ងន់ សហការជាមួយខណ្ឌពោធិសែនជ័យ ឃាត់ខ្លួនកាលពីថ្ងៃទី៦ ខែមករា ឆ្នាំ២០១៧កន្លងទៅ ក្រោយពីពួកគេបានធ្វើសកម្មភាពប្លន់ បាញ់សម្លាប់ម្ចាស់ផ្ទះលក់ស្រូវមួយកន្លែងនៅភូមិព្រៃក្រាយ សង្កាត់ស្នោ ខណ្ឌពោធិ៍សែនជ័យ និងក្រោយមកពួកគេបានរៀបចំធ្វើសកម្មភាពប្លន់ផ្ទះវេលុយវីង នៅភូមិវត្តស្លែង សង្កាត់ពងទឹក ខណ្ឌដង្កោ ប៉ុន្តែមិនបានសម្រេច ក៏ត្រូវសមត្ថកិច្ចក្របួចជាប់តែម្តង។

ក្នុងប្រតិបត្តិការបង្ក្រាបនោះ សមត្ថកិច្ចដកហូតបានកាំភ្លើង ម៉ាក អាកា៤៧ចំនួន៣ដើម មានបង់ចំនួន៣បង់ គ្រាប់ចំនួន៦១គ្រាប់ ខោអាវប៉ារ៉ាចំនួន ២ និងសម្ភារៈមួយចំនួនទៀត៕

https://youtu.be/BasMa4jTPs8