កំពង់ឆ្នាំងៈ គ្រោះថ្នាក់ចរាចរណ៍មួយបានកើតឡើង បន្ទាប់ពីយុវជន២នាក់ បានជិះម៉ូតូមួយគ្រឿងឌុបគ្នាក្នុងល្បឿនលឿន ជ្រុលចង្កូតបណ្តាលឲ្យដួលបោកទៅដងផ្លូវ រងរបួសយ៉ាងធ្ងន់ធ្ងរ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោងប្រហែល៨ព្រឹក ថ្ងៃទី១២ ខែមករា ឆ្នាំ២០១៧ ស្ថិតនៅចំណុចម្តុំបណ្តាលលង់វែក ក្នុងខេត្តកំពង់ឆ្នាំង។

អ្នកបើកបរម៉ូតូខាងលើ ត្រូវបានគេស្គាល់មានឈ្មោះហ៊ុល សុផាត ភេទប្រុស ចំណែកម្នាក់ទៀតមិនទាន់ស្គាល់អត្តសញ្ញាណនោះទេ អ្នកទាំង២នាក់រងរបួសធ្ងន់។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញយុវជនទាំង២នាក់ ជិះម៉ូតូមួយគ្រឿងឌុបគ្នាម៉ាក ហុងដាសេ១២៥ ពណ៌ខ្មៅ ស៊េរីឆ្នាំ២០០៨ ពាក់ស្លាកលេខ ភ្នំពេញ 1O-9783 បើកបរតាមបណ្តោយផ្លូវខាងលើ លុះបានមកដល់ចំណុចកើតហេតុ ក៏ជ្រុលចង្កូតដួលបោកទៅលើដងផ្លូវយ៉ាងពេញទំហឹង បណ្តាលឲ្យអ្នកទាំង២ រងរបួសយ៉ាងធ្ងន់ធ្ងរត្រូវបានគេបញ្ជូនទៅកាន់មន្ទីរពេទ្យតែម្តង៕

https://youtu.be/JHLNL0RZjao