ភ្នំពេញៈ ជនសង្ស័យជាស្ត្រីម្នាក់ ត្រូវបានសមត្ថកិច្ចនគរបាលខណ្ឌមានជ័យ ធ្វើការចាប់ខ្លួនពីបទជួញដូរនូវសារធាតុញៀនខុសច្បាប់ ក្រោយពីត្រួតពិនិត្យរកឃើញថ្នាំញៀន៦កញ្ចប់ជាប់នឹងខ្លួន ។

ការចាប់ខ្លួននេះបានធ្វើឡើងកាលពីវេលាម៉ោង១និង៣០នាទី រសៀលថ្ងៃទី១៥ ខែមករា ឆ្នាំ២០១៧ ស្ថិតនៅចំណុចផ្ទះជួលគ្មានលេខ ក្រុមទី៩ ផ្លូវលំ ភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យខាងលើ មានឈ្មោះ រឿង ស្រីទូច ហៅស្រីម៉ៅអាយុ២១ឆ្នាំ មុខរបរមិនពិតប្រាកដ ស្នាក់នៅចំណុចកើតហេតុខាងលើ។ ក្នុងនោះដែរ សមត្ថកិច្ចធ្វើការដកហូតបាន ថ្នាំញៀនចំនួន៦កញ្ចប់ ក្នុងនោះ១កញ្ចប់តូច និង៥កញ្ចប់ធំ ។

សមត្ថកិច្ចបានឲ្យដឹងថា មុននឹងឈានដល់ការចាប់ខ្លួនបានជនសង្ស័យខាងលើ គឺដើម្បីចូលរួមក្នុងយុទ្ធនាការបង្រ្កាបគ្រឿងញៀននៅខណ្ឌមានជ័យ នៅតែបន្តរដូចជាភ្លៀងរលឹមដោយមានការបញ្ជារផ្ទាល់ពីលោកវរសេនីយ៏ឯក តេង ស៊ីណូអធិការខណ្ឌមានជ័យ ទើបកម្លាំងនគរបាលខណ្ឌមានជ័យ ដឹកនាំការបង្ក្រាបដោយលោក ហ៊ួ ម៉េងវ៉ាង អធិការរងនគរបាលខណ្ឌមានជ័យ និងលោក មៅ សាវឿន នាយប៉ុស្តិ៍នគរបាលរដ្ឋបាលស្ទឹងមានជ័យ កម្លាំងសាលាសង្កាត់ស្ទឹងមានជ័យ បានចុះត្រួតពិនិត្យរដ្ឋបាលផ្ទះជួលខាងលើ ឃាត់ខ្លួនស្ត្រីម្នាក់ រួមនិងថ្នាំញៀនចំនួន៦កញ្ចប់ យកមកធ្វើការសាកសួរ។

បច្ចុប្បន្នជនសង្ស័យខាងលើ រួមនិងវត្ថុតាង ត្រូវបានសមត្ថកិច្ចនាំខ្លួនមកកាន់ ប៉ុស្តិ៍ស្ទឹងមានជ័យ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់អធិការដ្ឋានខណ្ឌមានជ័យ ឃុំខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់ តុលាការចាត់ការតាមនីតិវិធីច្បាប់៕