បន្ទាយមានជ័យ:តាមប្រភពព័ត៌មានពីប្រទេសថៃ បានឲ្យដឹងថា ស្ត្រីខ្មែរបានប្តីថៃម្នាក់ ត្រូវឃាតករលបបាញ់សម្លាប់ ពេលកំពុងអង្គុយហូបបាយ កាលពីវេលាម៉ោងជាង៧ យប់ថ្ងៃទី៧ ខែឧសភា ឆ្នាំ២០១៦នេះ នៅភូមិណងរឿ ឃុំណងណាំសៃ ស្រុកវ៉ាត់ថាណាណាក់ខន ខេត្តស្រះកែវ ប្រទេសថៃ។

ជនរងគ្រោះ ត្រូវប្រភពប្រាប់ថា ឈ្មោះម៉ាប់ អាយុ៤០ឆ្នាំ មានប្តីជាជនជាតិថៃ ក្នុងភូមិកើតហេតុ ឈ្មោះស៊ុមយុតអាក់នុតាក់ភីន អាយុ៥៦ឆ្នាំ។ ស្ត្រីរងគ្រោះ ត្រូវឃាតករបាញ់ត្រូវចំ សុដន់ខាងឆ្វេងចំនួន ៨គ្រាប់ ស្លាប់នៅ និងកន្លែងហើយពេលនេះសមត្ថកិច្ចថៃ កំពុងបើកការស៊ើបអង្គេត លើករណីលបបាញ់សម្លាប់ស្ត្រីរងគ្រោះនេះហើយ។

ជុំវិញបញ្ហាខាងលើលោក ប៊ុន សុខវិបុល អគ្គកុងស៊ុលខ្មែរ ប្រចាំស្រុកអារញ្ញខេត្តស្រះកែវ មិនអាចទាក់ទងសុំការបំភ្លឺបានទេ ដោយទូរស័ព្ទរបស់លោក ខលមិនចូល ហើយតាមរយៈប្រព័ន្ធវ៉សអាប់របស់លោកផ្ទាល់ ពេលភ្នាក់ងារសាកសួរដូចសព្វមួយដង ក៌មិនទាន់មានការឆ្លើយតបផងដែរ សង្ស័យលោកជាប់រវល់ហើយមើលទៅ៕