ព័ត៌មានជាតិ

រថយន្តទំនើបមួយគ្រឿង បើកបុកម៉ូតូស្លាប់យុវជនម្នាក់

កណ្តាល: មានករណីគ្រោះថ្នាក់ចរាចរណ៍ដ៍រន្ធត់មួយ ធ្វើឲ្យភ្ញាក់ផ្អើលទាំងយប់ខណ:ដែលរថយន្ត Lexus RX300 បើកបុកម៉ូតូViVa បណ្តាលឲ្យបែកក្បាល ស្លាប់យុវជនម្នាក់យ៉ាងអាណោចអាធម៍។ ហេតុការណ៍នេះបានកើតឡើង កាលពីវេលាម៉ោង៩និង៣០នាទី យប់ថ្ងៃទី០១ ខែកុម្ភ: ឆ្នាំ២០១៧នេះ ត្រង់ចំណុចខាងត្បូងប៉ុស្តិ៍ព្រែកឬស្សី ប្រហែល៣០ម៉ែត្រ លើផ្លូវជាតិលេខ២ ស្ថិតក្នុងភូមិព្រែកឬស្សី សង្កាត់ព្រែកឬស្សី ក្រុងតាខ្មៅ។

នគរបាលចររាចរណ៍បានប្រាប់ឲ្យដឹងថា ជនរងគ្រោះមានឈ្មោះ ហេង សេរីរិទ្ធ ភេទប្រុស អាយុ២៩ឆ្នាំ មានទីលំនៅក្នុងភូមិព្រែកតាពៅ សង្កាត់ដើមមៀន ក្រុងតាខ្មៅ។ រីឯជនបង្ករបានបើករថយន្តរត់គេចខ្លួនបាត់ស្រមោល។

សមត្ថកិច្ចបន្តទៀតថា ករណីគ្រោះថា្នក់ចរាចរណ៍នេះ បង្កឡើងដោយរថយន្តម៉ាក Lexus RX300 ពណ៌​ស្ក មិនស្គាល់ស្លាកលេខ បើកបរ​ក្នុង​ទិសដៅ​ពីត្បូងមកជើង មកដល់ចំណុចខាងលើក៏បានបុកជាមួយម៉ូតូមួយគ្រឿងម៉ាកSuzuki Viva ពណ៌ក្រហម ពាក់ផ្លាកលេខភ្នំពេញ 1AJ-8791 ក្នុងទិសដៅបញ្ច្រាស់ទិសគ្នា ជ្រុលចូលចំណែកផ្លូវខាងម៉ូតូ បណ្តាលឲ្យស្លាប់យុវជនម្នាក់ និងខូតខាងម៉ូតូយ៉ាងខ្លាំង ចំណែករថយន្តបានបើកគេចពីកន្លែងកើតហេតុទៅបាត់ស្រមោល។ ក្រោយពេលកើតហេតុ សពត្រូវបានក្រុមគ្រួសារ មកទទួលយកទៅធ្វើបុណ្យតាមប្រពៃណី៕

មតិយោបល់