ភ្នំពេញ: បើតាមសមត្ថកិច្ច បានឲ្យដឹងថា ទំនងជាដឹកលើសទម្ងន់ រថយន្តម៉ាកហ៊ីយន់ដាយមួយគ្រឿង ដែលផ្ទុកទៅដោយភេសជ្ជ:ជាច្រើនមុខពេញក្នុងឃ្លុបរថយន្ត បានបែកកង់ក្រោយ ក្រឡាប់ផ្ងារជើងប្រាស់ដេកទៅលើថ្នល់ ដោយចាក់ចោលភេសជ្ជ:អស់គ្មានសល់ ខណ:ដែលកំពុងតែបើក នៅតាមផ្លូវ។

ហេតុការណ៍នេះ បានកើតឡើងកាលពីវេលាម៉ោង ១០ និង ៣០នាទីព្រឹកថ្ងៃទី ១១ ខែ កុម្ភ: ឆ្នាំ ២០១៧ នៅតាមបណ្តោយផ្លូវរោងចក្រស្រាបៀថៃហ្គ័រ ស្ថិតនៅក្នុងភូមិបោះអង្កាញ់ សង្កាត់ព្រែកឯង ខណ្ឌច្បារអំពៅ។

ប្រភពពីសមត្ថកិច្ច បានឲ្យដឹងថា មុនពេលកើតហេតុ មានរថយន្តដឹកទំនិញម៉ាកហ៊ីយន់ដាយធន់មួយតោនកន្លះ ព៌ណស ពាក់ស្លាកលេខភ្នំពេញ២AF-៩៧២០ មួយគ្រឿង ដែលដឹកដោយភេសជ្ជ:ជាច្រើនប្រភេទ ពេញក្នុងឃ្លុបនោះ បានបើកបរដោយបុរសម្នាក់ ក្នុងទិសដៅពីត្បូងទៅជើង ក្នុងល្បឿនយ៉ាងលឿន។ លុះមកដល់ចំណុចខាងលើ ក៏ស្រាប់ផ្ទុះកង់ម្ខាងផ្នែកខាងក្រោយ លាន់ឭដូចផ្ទុះគ្រាប់បែក បណ្ដាលឲ្យក្រឡាប់ផ្ងាជើង និងចាក់ភេសជ្ជ:ពេញលើផ្លូវថ្នល់តែម្តង តែសំណាងល្អមិនបង្កឲ្យមាននរណាម្នាក់រងបួស ក្នុងគ្រោះថ្នាក់នេះទេ។

ក្រោយពេលកើតហេតុ កម្លាំងជំនាញចរាចរណ៍ខណ្ឌច្បារអំពៅ ក៏បានចុះទៅដល់កន្លែង ដោយធ្វើការពិនិត្យមើលទៅឃើញថា មិនបង្កផលប៉ះពាល់ដល់សម្បត្តិសាធារណ: ឬមានមនុស្សណាម្នាក់របួសទ្បើយ ក៏អនុញ្ញាតឲ្យម្ចាស់យករថយន្តមកស្ទូចយកវាចេញទៅផងដែរ៕