ប៉ៃលិនៈ គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីយុវជន៣នាក់ ជិះម៉ូតូឌុបគ្នាក្នុងល្បឿនលឿន ជ្រុលចង្កូតធ្លាក់ផ្លូវ បន្តល្បឿនទៅបុកដើមឈើពេញទំហឹង បណ្តាលឲ្យអ្នកទាំង៣នាក់ ខ្ទាតស្លាប់យ៉ាងអាណោចអាធ័ម។

ហេតុការណ៍នេះបានកើតឡើងកាលពីវេលាម៉ោង ២ រំលងអធ្រាត្រឈានចូលថ្ងៃទី១ ខែមីនា ឆ្នាំ២០១៧ ស្ថិតនៅចំណុចបន្ទាយស្រែម្អម ក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន។

សមត្ថកិច្ចបានឲ្យដឹងថា ជនរងគ្រោះទី១ឈ្មោះ ចាវ ភេទប្រុស អាយុ២១ឆ្នាំ ,ទី២ឈ្មោះ កែវ ភេទប្រុស អាយុ១៩ឆ្នាំ និងជនរងគ្រោះទី៣ឈ្មោះ កុល ភេទប្រុស អាយុ ២១ឆ្នាំ។ អ្នកទាំងបី រស់នៅភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។

ក្រោយកើតហេតុ សមត្ថកិច្ចបានចុះមកធ្វើការវាស់វែង និងនាំយកម៉ូតូខាងលើ មករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីរង់ចាំសាច់ញាតិមកទទួលយក ។ ចំណែកសាកសព សមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណីផងដែរ៕