ភ្នំពេញៈ តាមសមត្ថកិច្ច បានឲ្យដឹងថា កាលពីវេលាម៉ោង ៧ និង២០នាទីយប់ថ្ងៃទី១១ ខែមិនា ម៉ូតូ២គ្រឿងបានបុកគ្នាយ៉ាងពេញទំហឹង លាន់ឮសូរដូចរន្ទះ បណ្តាលឲ្យជីវិតបុរស២នាក់ បាត់បង់ជីវិត ដោយដេកស្លាប់នៅក្នុងថ្លុកឈាម ចំណែកម្នាក់ទៀតរងរបួសធ្ងន់ ត្រូវបានរថយន្តសាមុយបញ្ជូន ទៅមន្ទីពេទ្យភ្លាមៗផងដែរ។

ហេតុការណ៍នេះ បានកើតឡើងនៅតាមបណ្តោយផ្លូវជាតិលេខ៤ ជិតសាលាក្តីខ្មែរក្រហម សង្កាត់កំបូល ខណ្ឌពោធិសែនជ័យ រាជធានីភ្នំពេញ។ ជនរងគ្រោះ (ស្លាប់) ឈ្មោះ ប៊ុនលីម អាយុ ៣៧ឆ្នាំ ស្នាក់នៅថ្នល់ទទឹង។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឃើញម៉ូតូមួយគ្រឿង ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ភ្នំពេញ1AY-3137 ជិះគ្នា២នាក់ប្រុសធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីលិច ទៅកើត ចំណែកឯម៉ូតូមួយគ្រឿងទៀតម៉ាក ហុងដាឌ្រីមសេ១២៥ ពណ៌ខ្មៅ ពាក់ស្លាកលេខ ជិះដោយបុរសម្នាក់ ធ្វើដំណើរតាមបណ្តោយផ្លូវខាងលើ ក្នុងទិសដៅពីកើតទៅលិច ខណៈមកដល់ចំណុចកើតហេតុ ភាគីខាងម៉ូតូដែលមានគ្នា២នាក់ បានព្យាយាមវ៉ារថយន្ត កុងតឺន័រ មួយគ្រឿង ប៉ុន្តែវ៉ាមិនផុតបែរជាបុកជាមួយម៉ូតូមួយទៀតពេញទំហឹង ក្នុងទិសដៅបញ្ជ្រាស់ទិសគ្នា បណ្តាលឲ្យ បុរស២នាក់ស្លាប់ នៅនឹងកន្លែង និងម្នាក់ទៀតរងរបួសធ្ងន់ធ្ងរ។

ក្រោយពេលកើតហេតុសពជនរងគ្រោះទាំង២នាក់ ត្រូវក្រុមគ្រួសារដឹកយកទៅធ្វើបុណ្យនៅឯលស្រុកកំណើត ចំណែកម៉ូតូទាំង២គ្រឿង ត្រូវបានសមត្ថកិច្ចចរាចរចណ៍ក្រុងវាស់វែង និងយកទៅរក្សាទុកនៅការិយាល័យចារចណ៍ផ្លូវគោកនៃស្នងការនគរបាលរាជធានីភ្នំពេញ ដើម្បីរងចាំការដោះស្រាយតាមនីតិវីធីច្បាប់៕