ភ្នំពេញ ៖ បុរសម្នាក់បានបាត់ខ្លួនពីផ្ទះជាង ០២ខែមកហើយ ដោយបានទៅលោងលោមស្ត្រីម្នាក់ ហើយបុរសនោះ បានអះអាងថា ខ្លួនលែងលះប្រពន្ធដើមដាច់ស្រេចហើយ និងបានមករួមរស់នៅជាមួយគ្នាបានរយៈពេល ០២ខែ ហើយក៏ត្រូវបានប្រពន្ធដើម ប្រទះឃើញនៅផ្ទះជួលជាមួយគ្នា កាលពីថ្ងៃទី០៤ ខែមេសា ឆ្នាំ២០១៦ ដែលស្ថិតនៅចំណុចបន្ទប់ជួល ផ្លូវលំ ភូមិទួលគោក សង្កាត់ទួលសង្កែ ខណ្ឌឫស្សីកែវ ។
ស្ត្រីដែលត្រូវជាប្រពន្ធចុងនោះមានឈ្មោះ យ៉ុង ភេទ ស្រី អាយុ ៤០ឆ្នាំ មុខរបរ លក់ចេកចៀន ស្នាក់នៅផ្ទះជួលខាងលើ មានស្រុកកំណើតភូមិថ្មី ឃុំកោះធំ ស្រុកស្អាង ខេត្តកណ្តាល ។ ចំណែកឯបុរសជាប្តីមានឈ្មោះ ណាត ភេទ ប្រុស អាយុ ៥០ឆ្នាំ មុខរបរ រត់ម៉ូតូឌុប ដែលមានប្រពន្ធដើមឈ្មោះ ហៀង ភេទ ស្រី អាយុ ៤៨ឆ្នាំ មុខរបរ លក់បន្លែ ស្នាក់នៅក្បែរផ្សារជម្ពូវ័ន្ត សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅជាមួយគ្នា ។
ស្ត្រីដែលជាប្រពន្ធចុង បានបន្តទៀតថា រូបគាត់បានលែងលះគ្នាជាមួយប្តីមុនរយៈពេលជាង ៦ឆ្នាំមកហើយ ដោយមានកូនចំនួន ០៣នាក់ហើយ ក្រោយមក ទើបមានទំនាក់ទំនងស្នេហាជាមួយបុរសខាងលើបានរយៈពេលជាង ០៥ខែ ហើយទើបតែរស់នៅជាមួយគ្នានៅផ្ទះជួលជាង ០២ខែទេ ។
ស្រាប់តែនៅថ្ងៃកើតហេតុខាងលើ ក៏ត្រូវបានប្រពន្ធដើមមកឃើញនៅផ្ទះជួល ហើយបានរករឿង ព្រមទាំងបានវាយឲ្យរហែកខោអាវ និងបានឈ្លោះប្រកែកគ្នាមួយ ប្រាវ ទើបនាំគ្នាមកប៉ុស្តិ៍នគរបាលទួលសង្កែ ដើម្បីឲ្យជួយអន្តរាគមន៍ ។
ក្រោយមក ស្ត្រីដែលជាប្រពន្ធចុងនោះ បានទាមទារសងជំងឺចិត្តពីប្រពន្ធដើមចំនួន ៣០០ដុល្លារអាមេរិក តែប្រពន្ធដើមសុំឲ្យសមត្ថកិច្ចជួយហៅប្តីរបស់គាត់មកធ្វើកិច្ចសន្យាឈប់ឲ្យមានទំនាក់ទំនងជាមួយនិងប្រពន្ធចុងទៀត ៕
មតិយោបល់