សៀមរាប ៖ សមត្ថកិច្ចបានឲ្យដឹងថា ក្មេងៗប្រុស/ស្រីចំនួន០៣នាក់ បានពុលមីកញ្ចប់តូចៗ ដែលពួកគេទិញនៅតូបចាបហួយ យកមកហូបស្រាប់តែក្អួតចង្អោរពុលតែម្តងហើយត្រូវបានក្រុមគ្រួសារជួយសង្គ្រោះទាន់ពេល។
ករណីពុលមីកញ្ចប់ខាងលើនេះកើតឡើងនៅថ្ងៃទី០៣ ខែមេសា ឆ្នាំ២០១៦ក្នុងភូមិក្រាំង ឃុំខ្វាវស្រុកជីក្រែងខេត្តសៀមរាប។
លោកវរសេនីយ៍ត្រី សុខ សុទ្ធាវុធ អធិការស្តីទីស្រុកជីក្រែង បានឲ្យដឹងថា ករណីក្មេងពុលមីកញ្ចប់តូចៗ ដែលមានលាយគ្រឿងផ្សំរួចច្រកកញ្ចប់តូចនោះគឺពិតជាមានមែនហើយហេតុការណ៍នេះក្រុមគ្រួសារជួយសង្គ្រោះទាន់ពេលដោយមិនបណ្តាលឲ្យក្មេងណាម្នាក់រងការពុលធ្ងន់ធ្ងរនោះទេ។
លោកបម្តថា ក្មេងដែលពុលមីកញ្ចប់តូចដែលមានលេខកូដ៨៩១ នោះមានឈ្មោះទី១-ឈ្មោះ ហឹម សុឃី ភេទស្រី អាយុ៨ឆ្នាំ, ទី២-ឈ្មោះ ហឹម ឃន់ ភេទប្រុស អាយុ៣ឆ្នាំ ត្រូវជាប្អូនឈ្មោះ ហឹម សុឃី និងទី៣-ឈ្មោះ វី ពិសិដ្ឋ ភេទស្រី អាយុ២ឆ្នាំ។
លោកបន្តថា ចំពោះផលិតផលមីកញ្ចប់តូចវិញកម្លាំងសមត្ថកិច្ចស្រុកកំពុងធ្វើការត្រួតពិនិត្យជាមួយមន្ទីរសុខាភិបាលស្រុក ដើម្បីឲ្យដឹងថា មីកញ្ចប់នោះមានសារធាតុពុលឫមួយមកពីផលិតផលនោះហួសកាលបរិច្ឆេទ។លោកបន្ថែមថា ក្នុងនាមជាសមត្ថកិច្ចសូមធ្វើការអំពាវនាវដល់មាតាបិតាក្មេងៗទាំងអស់ត្រូវបង្កើនការយកចិត្តទុកដាក់អំពីបញ្ហាសុខុមាលភាពរបស់កូនៗត្រូវធ្វើការពន្យល់ឲ្យបានច្រើនអំពីនំចំណីដែលញាំទៅធ្វើឲ្យពុលដូចជាករណីខាងលើនេះ។
សូមរំលឹកថា កន្លងទៅនៅខេត្តសៀមរាប ធ្លាប់មានកូនក្មេងតូចៗបានទៅទិញនំចំណីផ្សេងៗនៅតាមតូបចាបហួយ ហើយបានពុលជាបន្តបន្ទាប់ដែរតែ ជំនាញពាក់ព័ន្ធនៅក្នុងខេត្តនេះហាក់នៅមិនទាន់ស្រាយចម្ងល់ទាំងនេះជូនរាស្ត្រនៅឡើយ៕
មតិយោបល់