ភ្នំពេញៈ ជនសង្ស័យ៣នាក់ ត្រូវបានសមត្ថកិច្ចឃាត់ខ្លួនពាក់ពន្ធ័នឹងករណីកាន់កាប់អាវុធដោយខុសច្បាប់។ ការចាប់ឃាត់ខ្លួននេះបានធ្វើឡើងកាលពីវេលាម៉ោង១១យប់រំលងអាធ្រាត្រ ថ្ងៃទី១៧ ខែមីនា ឆ្នាំ២០១៧ នៅចំណុចផ្លូវខាងសារិន ក្រុមទី៧ ភូមិបឹងសាឡាង សង្កាត់ឬស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទាំង៣នាក់ ទី១មានឈ្មោះ យាន សុន ភេទប្រុស អាយុ៣៦ឆ្នាំ មុខរបរជាងផ្សារដែក,ទី២ឈ្មោះ ស្រ៊ាង វណ្ណៈ ភេទប្រុស អាយុ១៨ឆ្នាំ មុខរបរជាងផ្សារដែក ស្នាក់នៅផ្ទះជួល ផ្លូវបេតុង ក្រុមទី៧ ភូមិមិត្តភាព សង្កាត់ឬស្សីកែវ និងទី៣ឈ្មោះ សយ ភារៈ ភេទប្រុស អាយុ២១ឆ្នាំ មុខរបរជាងផ្សារដែក ស្នាក់នៅផ្ទះជួល ផ្លូវបេតុង ក្រុមទី៦ ភូមិបឹងសាឡាង សង្កាត់ឬស្សីកែវ។

មុនឈានដល់ការចាប់ឃាត់ខ្លួន កម្លាំងអធិការដ្ឋាននគរបាលខណ្ឌឬស្សីកែវ បានចុះល្បាតក្នុងភូមិសាស្រ្ត ក៏បានប្រទះឃើញជនសង្ស័យទាង៣នាក់ ដោយមានការសង្ស័យក៏ឃាត់ឆែកឆេរ ជាលទ្ធផលដកហូតបាន ដាវកែឆ្នៃសាំម៉ូរាយ ចំនួន២ដើម និងម៉ូតូមួយគ្រឿងម៉ាកសេ១២៥ ស៊េរី០១២ ព៌ណខ្មៅ ពាក់ស្លាកលេខ ភ្នំពេញ១BI-៧៤៤៣ មានបិតស្លាកលេខដោយម៉ាស់បិតមុខ។

ចប្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចឃុំខ្លួនជាបណ្តោះអាសន្ន នៅអធិការដ្ឋាននគរបាលខណ្ឌឬស្សីកែវ ដើម្បីសាកសួរនិងកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការទៅតាមផ្លូវច្បាប់៕