អេក្រង់កុំព្យូទ័រ ឬហៅថា Monitor ដ៏ប្រណិតបំផុតថ្មីមួយរបស់ក្រុមហ៊ុន LG ដែលទើបបានបើកបង្ហាញនៅឯព្រឹត្តិការណ៍ CES ខែមករា កន្លងទៅនេះ ឥឡូវត្រូវបានប្រកាសនូវតម្លៃ និងកាលបរិច្ឆេទចេញលក់ហើយ។

យោងតាមគេហទំព័រ The Verge អេក្រង់កុំព្យូទ័រ LG ម៉ូឌែល 32UD99 ដែលមានខ្នាតបញ្ចាំងរូបភាព 4K កម្រិត HDR នេះ ត្រូវបានហាងលក់ទំនិញអនឡាញ B&H ចាប់បើកឱ្យបញ្ជាទិញនៅថ្ងៃទី ២៨ ខែមីនា ក្នុងតម្លៃ ៩៩៩ ដុល្លារ ទន្ទឹមនឹងហាង Adorama ផងដែរ។

Monitor ទំហំ ៣២ អីុញនេះ ត្រូវបានរចនាឡើងជាមួយស៊ុមអេក្រង់ស្តើងបំផុត និងអាចបញ្ចាំងរូបភាពពណ៌ធម្មជាតិ ភ្លឺច្បាស់ត្រជាក់ភ្នែក ហើយវាទំនងជាផលិតឡើងសម្រាប់គោលដៅអតិថិជន ដែលនិយមលេងហ្គេមដែលទាមទារក្រាហ្វិកកម្រិតខ្ពស់ និងសម្រាប់ការងាររចនា និងកាត់តវីដេអូតែម្តង។

ដោយឡែក វាមានភ្ជាប់មកជាមួយរន្ធដោតខ្សែ USB-C, DisplayPort, រន្ធ HDMI 2.0 ពីរ និងរន្ធ USB 3.0 បី ព្រមទាំងភ្ជាប់មកជាមួយបច្ចេកវិទ្យា AMD FreeSync និងរន្ធបំពងសំឡេង Stereo រួចជាស្រេចផងដែរ៕