កណ្តាលៈ គ្រោះថ្នាក់ចរាចរណ៍មួយបង្កឡើងដោយរថយន្តហ៊ីយ៉ាន់ដាយ ធន់ធំ មួយគ្រឿង បានបុកជាមួយនឹងម៉ូតូហុងដាសេ១២៥ ពណ៌ខ្មៅ អូសប្រហែល២៥០ម៉ែត្រ បណ្តាលឲ្យមនុស្សប្រុសស្រី២នាក់ស្លាប់យ៉ាងអាណោចអាធ័ម ។

ហេតុការណ៍នេះបានកើតឡើងកាលពីវេលាម៉ោង ១និង១៥នាទី រសៀលថ្ងៃទី១៨ ខែមីនា ឆ្នាំ២០១៧ ស្ថិតនៅចំណុចផ្លូវជាតិលេខ៥ ចន្លោះគីឡូម៉ែត្រលេខ ២៦-២៧ ភូមិពញាឮ ឃុំពញាឮ ស្រុកពញាឮ ខេត្តកណ្ដាល។

យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខ កំពង់ឆ្នាំង 1C-8313 បើកបរក្នុងទិសដៅពីត្បូងទៅជើង ដោយឈ្មោះ ឆឹង ឆូយ ភេទប្រុស អាយុ៣៨ឆ្នាំ ស្នាក់នៅភូមិបឹងកក់ ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង រួមដំណើរដោយឈ្មោះ ណែត ណា ភេទស្រី អាយុ៤៥ឆ្នាំ ស្នាក់នៅជាមួយគ្នា
បើកបរមកដល់កន្លែងកើតហេតុ ក៏មានរថយន្តមួយគ្រឿង ម៉ាកហ៊ីយ៉ាន់ដាយ ពណ៌ ស ពាក់ស្លាកលេខ ភំ្នពេញ 3B-2214 បើកបរក្នុងទិសដៅស្របគ្នា ពីក្រោយ
ក្នុងល្បឿនលឿន បានបុករុញពីក្រោយ កិនស្លាប់អ្នកទាំង២នាក់យ៉ាងអាណោចអាធ័ម ។ រីឯរថយន្តបើកអូសទាំងម៉ូតូទៅចម្ងាយប្រហែល២៥០ម៉ែត្រ ទើបឈប់ហើយអ្នកបើកបរគេចខ្លួន។

ក្រោយកើតហេតុ សមត្ថកិច្ចនគរបាលចរាចរណ៍ជំនាញបានចុះមកធ្វើការវាស់វែង នាំយកមធ្យោបាយធ្វើដំណើរទាំង២គ្រឿង យកទៅរក្សាទុកនៅអធិការដ្ឋាននគរបាលស្រុកពញាឭ ដើម្បីរង់ចាំធ្វើការដោះស្រាយគ្នាពេលក្រោយតាមផ្លូវច្បាប់។ ចំណែកសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕

https://youtu.be/jUr7tDkl7ZY