រតនគិរីៈ លោកអធិការរងស្រុកកូនមុំ បានប្រាប់ Post News ថា មានករណីគ្រោះថ្នាក់ចរាចរណ៍មួយកើតឡើង រវាងរថយន្តមួយគ្រឿង បើកទៅបុកអ្នកដំណើរថ្មើជើង៤នាក់ ដែលកំពុងដើរតាមដងផ្លូវពេញទំហឹង បណ្តាលឲ្យមានអ្នកស្លាប់និងរបួសត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង ១១យប់ ថ្ងៃទី១៩ ខែមីនា ឆ្នាំ២០១៧ ស្ថិតនៅចំណុចលើបណ្តោយផ្លូវ៧៨ គីឡូម៉ែត្រលេខ៦០ ភូមិ៤ ក្នុងឃុំត្រពាំងច្រេស ស្រុកកូនមុំ ខេត្តរតនគិរី ។

សមត្ថកិច្ចបានឲ្យដឹងថា ជនរងគ្រោះទាំង៤នាក់ ទី១ឈ្មោះ គង់ សំអុន ភេទប្រុសអាយុ៣៤ឆ្នាំ ខ្មែររមុខរបរកសិករ ស្លាប់នៅនឹងកន្លែងកើតហេតុ។ ទី២ឈ្មោះ ហឿង សាមន ភេទស្រី អាយុ៤១ឆ្នាំ របួសស្រាល។ ទី៣ឈ្មោះ ហឿង ឆវន្ត ភេទស្រីអាយុ២២ឆ្នាំ របួសស្រាល និងទី៤ឈ្មោះ ហឿង សម្បត្តិ ភេទស្រី អាយុ៣៥ឆ្នាំ
របួសធ្ងន់។ អ្នកទាំង៤នាក់ ស្នាក់នៅភូមិឃុំ កើតហេតុខាងលើ។

ចំណែកអ្នកបើកបររថយន្តបង្កមានឈ្មោះ សុខ ថាន ភេទប្រុស អាយុ៤២ឆ្នាំ
មុខរបរជាអ្នកបម្រើកាងារ ឲ្យក្រុមហ៊ុន ហងអញ (លំផាត់) បើករថយន្តម៉ាកតាកូម៉ា ពណ៌ស្លែ ពាក់ស្លាកលេខ ភ្នំពេញ 2A-6997 ។

ក្រោយពីកើតហេតុ សាកសពជនរងគ្រោះ ត្រូវបានសមត្ថកិច្ចធ្វើកំណត់ហេតុ ប្រគល់ឲ្យក្រុមគ្រួសារធ្វើបុណ្យតាមប្រពៃណី ចំណែករថយន្តបង្ករួមនិងអ្នកបើកបរ ត្រូវបានសមត្ថកិច្ចនាំខ្លួនយកទៅកាន់អធិការដ្ឋាននគរបាលស្រុក ដើម្បីចាត់
ការតាមនីតិវិធីច្បាប់បន្តទៀត៕