ភ្នំពេញ: រថយន្តឡង់គឺ្រស័រមួយគ្រឿង បើកគេចរទេះអេតចាយ បួងចង្កូតទៅបុកនិងខឿនសួនច្បារ និងបង្គោលដែកដាក់បាំង រ៉ូមីនេទឹករបស់រដ្ឋ បណ្ដាលឲ្យខូចខាត នៅត្រង់ចំណុចការ៉ាសសាំង MPL ជាប់នឹងស្តាតអូរឡាំពិក តាមបណ្ដោយផ្លូវ១៦១ ស្ថិតក្នុសង្កាត់បឹងព្រលឹត ខណ្ឌ៧មករា រាជធានីភ្នំពេញ។

ប្រភពព័ត៌មានពីអ្នកបើករថយន្តខាងលើ បានប្រាប់Post Newsថា មុនពេលកើតហេតុ គាត់បានបើករថយន្តតាមបណ្តោយផ្លូវលេខ១៦១ ក្នុងទិសដៅពីត្បូងទៅជើង ក្នុងល្បឿនលឿនល្មម ខណ:មកដល់ចំណុចការ៉ាសសាំងMPL គាត់បានបើករថយន្តគេច ពីរទេះអេតចាយដែលកំពុងអូស ពីមុខរថយន្តរបស់គាត់ ធ្វើឲ្យរថយន្ត បួងចង្កូតជ្រុលឡើងទៅបុកនឹងខឿនសួនច្បារ និងបង្គោលដែកដាក់បាំងរ៉ូមីនេទឹករបស់រដ្ឋ បណ្ដាលឲ្យខូចខាត សំណាងល្អមិនបណ្តាលឲ្យមានមនុស្សរងរបួសនោះឡើយ។

ក្រោយកើតហេតុ សមត្ថកិច្ចជំនាញបានសហការជាមួយសមត្ថកិច្ចចរាចរណ៍ជើងគោក ការិយាល័យជើងគោកនៃស្នងការដ្ឋាននគរបាលរាជធានីភ្នំពេញ ដើម្បីចុះវាស់វែងយករថយន្តទៅរក្សាទុករង់ចាំដោះស្រាយនាពេលក្រោយតាមច្បាប់ ៕