បាត់ដំបង: ហេតុការណ៍ភ្ញាក់ផ្អើលមួយបានកើតឡើង បន្ទាប់ពីក្មេងស្រីអាយុ១០ឆ្នាំម្នាក់ ត្រូវបានគេអះអាងថាកម្រោលចូល បានធ្វើអត្តឃាតចងកសម្លាប់ខ្លួនស្លាប់យ៉ាងអាណោចអាធ័ម ផ្អើលប្រជាពលរដ្ឋនិងសមត្ថកិច្ចចុះមកអន្តរាគមន៍ពិនិត្យ។

ហេតុការណ៍នេះបានកើតឡើងកាលពីវេលាម៉ោង៨និង១០នាទី ព្រឹកថ្ងៃទី២៣ ខែមីនា ឆ្នាំ២០១៧ ស្ថិតនៅចំនុចក្រុម៤ ភូមិអន្លង់វិល ស្រុកសង្កែ ខេត្តបាត់ដំបង។

សាកសពជនរងគ្រោះខាងលើនេះ មានឈ្មោះ ជា ចម្រើន ភេទស្រី អាយុ១០ឆ្នាំស្នាក់នៅភូមិកើតហេតុខាងលើ។ ក្រោយពីកើតហេតុហើយនោះ សមត្ថកិច្ចនគរបាលជំនាញផ្នែកកោសល្យវិច័យ បានចុះមកធ្វើការពិនិត្យសាកសពដល់កន្លែងកើតហេតុ បានឲ្យដឹងថា សាកសពជនរងគ្រោះខាងលើនេះដោយសារតែការធ្វើអត្តឃាតចងកសម្លាប់ខ្លួនឯងពិតប្រាកដមែន មិនមែនជាករណីឃាតកម្មអ្វីនោះទេ ហើយបច្ចុប្បន្នសាកសពជនរងគ្រោះត្រូវបានសមត្ថកិច្ចប្រគល់ទៅឲ្យក្រុមគ្រួសារធ្វើបុណ្យតាមប្រពៃណី។ ទន្ទឹមនឹងនោះដែរ គ្រួសារជនរងគ្រោះបានឲ្យដឹងថា កូនគាត់គឺត្រូវកម្រោលចោល ទើបធ្វើអត្តឃាតបែបនេះ៕