ភ្នំពេញៈ ជនសង្ស័យម្នាក់បានធ្វើសកម្មភាព គាស់ផ្ទះមួយកន្លែងបានសម្រេច និងបានចូលទៅរើកកាយរកទ្រព្យសម្បត្តិនៅក្នុងផ្ទះ ស្រាប់តែមានគេឃើញទាន់ ប្រញាប់ប្តឹងសមត្ថកិច្ចចាប់ខ្លួនបានតែម្តង។

ហេតុការណ៍នេះបានកើតឡើងកាលពីវេលាម៉ោង១០ព្រឹក ថ្ងៃទី២៣ ខែមីនា ឆ្នាំ២០១៧ នៅក្នុងភូមិតាកេរ្តិ៍ សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យរូបនោះ ឈ្មោះ យឹម ចាន់ណា អាយុ២៦ឆ្នាំ ស្នាក់នៅមិនពិតប្រាកដនិង មានស្រុកកំណើតនៅ ក្នុងភូមិកើតហេតុខាងលើ។

ប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុ ម្ចាស់ផ្ទះខាងលើមិនបាននៅផ្ទះនោះទេ ព្រោះជាប់រវល់ ចេញទៅក្រៅ ប៉ុន្តែមុនពេលចេញទៅ បានចាក់សោរត្រឹមត្រូវ ខណៈនោះជនសង្ស័យបានទៅធ្វើសកម្មភាព គាស់ទ្វារចូលទៅសម្ងំរើកកាយយកទ្រព្យសម្បត្តិបានលុយចំនួន២៨,០០០រៀល ប៉ុន្តែមិនទាន់ដឹងថាម្ចាស់ផ្ទះបាត់អ្វីខ្លះនោះទេព្រោះម្ចាស់ផ្ទះមិនទាន់បានបញ្ជាក់នៅឡើយទេ ខណៈពេលកំពុងរើ ត្រូវបានអ្នកស្គាល់ម្ចាស់ផ្ទះឃើញទ្វារបើក មានការសង្ស័យក៏ទៅសួរជននោះ បាន២-៣ម៉ាត់ ធ្វើឲ្យជនសង្ស័យភ័យខ្លួន ក៏រត់ចេញក្រៅ ខណៈនោះអ្នកសួរក៏ស្រែកថាចោរៗបណ្តាលឲ្យផ្អើលដល់ប្រជាការពារ និងប្រជាពលរដ្ឋចាប់បានប្រគល់ឲ្យសមត្ថកិច្ចតែម្តង៕

https://youtu.be/YlvOQFxzZkI