ព័ត៌មានជាតិ

នគរបាលអន្តោប្រវេសន៍កម្ពុជា ឃាត់ខ្លួនជនជាតិវៀតណាមចំនួន២០នាក់ ចូលមកស្នាក់នៅដោយខុសច្បាប់

ភ្នំពេញ: កម្លាំងនគរបាលនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដែលដឹកនាំដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនិតិវិធី ដោយមានការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានចុះត្រួតពិនិត្យការស្នាក់នៅ និងបំពេញការងាររបស់ជនបរទេសនៅតាមបណ្តារោងសិប្បកម្មឈើមួយចំនួន ដោយធ្វើការឃាត់ខ្លួនជនជាតិវៀតណាមចំនួន២០នាក់នៅបឹងត្របែក។

ការឃាត់ខ្លួននេះបានធ្វើឡើងកាលពីវេលាម៉ោង៨ និង៣០នាទី ព្រឹកថ្ងៃទី២៤ ខែមីនា ឆ្នាំ២០១៧ នៅតាមបណ្តោយផ្លូវលេខ ៤៧៤ ក្នុងសង្កាត់បឹងត្របែក ខណ្ឌចម្ការមន រាជធានីភ្នំពេញ។

លោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនិតិវិធីបានឲ្យដឹងថា ក្នុងថ្ងៃនេះដែរកម្លាំងរបស់លោកបានចុះអនុវត្តច្បាប់អន្តោប្រវេសន៍នៃព្រះរាជាណាចក្រកម្ពុជា ដោយបានចុះធ្វើការត្រួតពពិនិត្យការស្នាក់នៅ និងបំពេញការងាររបស់ជនបរទេសនៅតាមបណ្តាររោងសិប្បកម្មកែច្នៃឈើមួយចំនួនដែលមានទីតាំងនៅបឹងត្របែកនេះ។ ដោយក្នុងប្រតិបត្តិការនេះដែរ កម្លាំងរបស់លោកបានធ្វើការឃាត់ខ្លួននជនជាតិវៀតណាមសរុបចំនួន ២០នាក់់ ក្នុងនោះមានស្រីចំនួន៤នាក់់ ដែលកំពុងតែស្នាក់នៅនិងបំពេញការងារដោយគ្មានលិខិតស្នាមអ្វីទាំងអស់ ដើម្បីចាត់ការទៅតាមផ្លូវច្បាប់ជាបន្តទៅទៀត។

ក្រោយប្រតិបត្តិការនេះជនជាតិវៀតណាមប្រុសស្រីទាំងចំនួន២០នាក់ ដែលកំពុងតែលួចស្នាក់នៅ និងបំពេញការងារដោយគ្មានលិខិតស្នាមអ្វីសោះទាំងអស់នេះ ត្រូវបាននាំខ្លួនទៅកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដើម្បីរង់ចាំធ្វើការបណ្តេញចេញទៅតាមច្បាប់៕

មតិយោបល់