(Reuters) - កាលពីថ្ងៃច័ន្ទ កោះតៃវ៉ាន់បាននិយាយថា យន្តហោះចម្បាំងចិនចំនួន ២៥ គ្រឿងក្នុងនោះមានទាំងយន្តហោះប្រយុទ្ធ និងយន្តហោះអាចទំលាក់គ្រាប់បែកនុយក្លេអ៊ែរបានចូលទៅកាន់តំបន់ការពារដែនអាកាសរបស់កោះតៃវ៉ាន់ (ADIZ) ។
ខណៈពេលដែលមិនទាន់មានសេចក្តីអត្ថាធិប្បាយភ្លាមៗពីទីក្រុងប៉េកាំងនៅឡើយ ព័ត៌មាននេះបានផ្សព្វផ្សាយបន្ទាប់ពីក្រសួងការបរទេសសហរដ្ឋអាមេរិកបានចេញសេចក្តីណែនាំថ្មីដែលបន្ថែមសេរីភាពឲ្យមន្ត្រីសហរដ្ឋអាមេរិកជួបជាមួយនឹងមន្ត្រីតៃវ៉ាន់ដើម្បីរឹតបន្តឹងចំណងមិត្តភាពជាមួយតៃប៉ិថែមទៀតកាលពីថ្ងៃសុក្រនេះ។
ក្នុងរយៈពេលប៉ុន្មានខែចុងក្រោយនេះ កោះតៃវ៉ាន់បានតវ៉ាចំពោះការធ្វើបេសកកម្មម្តងហើយម្តងទៀតដោយកងទ័ពអាកាសរបស់ចិននៅក្បែរកោះមួយនេះ ដែលបានធ្វើសកម្មភាពនៅភាគនិរតីនៃតំបន់ការពារដែនអាកាសរបស់ខ្លួននៅជិតកោះ Pratas ដែលគ្រប់គ្រងដោយតៃវ៉ាន់។
ក្រសួងការពារជាតិតៃវ៉ាន់បាននិយាយថាបេសកកម្មចុងក្រោយបង្អស់របស់ប្រទេសចិនមានពាក់ព័ន្ធនឹងយន្តហោះប្រយុទ្ធប្រភេទ J-16 ចំនួន ១៤ គ្រឿង និងយន្តហោះប្រយុទ្ធប្រភេទ J-10 ចំនួន ០៤ គ្រឿងក៏ដូចជាយន្តហោះទម្លាក់គ្រាប់បែក H-6K ចំនួន ៤ គ្រឿងដែលអាចផ្ទុកអាវុធនុយក្លេអ៊ែរ យន្តហោះប្រឆាំងនាវាមុជទឹក ២ គ្រឿង និងយន្តហោះប្រកាសសញ្ញាអាសន្ន០១ គ្រឿង។
នេះជាការលុកលុយប្រចាំថ្ងៃធំបំផុតចាប់តាំងពីពេលដែលក្រសួងការពារជាតិបានចាប់ផ្តើមរាយការណ៍ពីសកម្មភាពលុកលុយរបស់កងទ័ពអាកាសចិននៅក្នុងតំបន់ ADIZ របស់តៃវ៉ាន់កាលពីឆ្នាំមុន។
ក្រសួងការពារជាតិតៃវ៉ាន់បានបន្ថែមទៀតថា ខ្លួនបានបញ្ជូនយន្តហោះប្រយុទ្ធទៅស្ទាក់ និងព្រមានយន្តហោះចម្បាំងចិនខណៈដែលប្រព័ន្ធមីស៊ីលក៏ត្រូវបានដាក់ពង្រាយដើម្បីត្រួតពិនិត្យសកម្មភាពនេះផងដែរ។
យោងតាមផែនទីដែលក្រសួងការពារជាតិបានផ្តល់ឲ្យ យន្តហោះចិនទាំងនោះបានហោះហើរនៅតំបន់ជិតកោះ Pratas ។
កាលពីអតីតកាល ប្រទេសចិនបានពណ៌នាថា បេសកកម្មហោះហើរនេះធ្វើឡើងដើម្បីការពារអធិបតេយ្យភាពរបស់ប្រទេស និងដោះស្រាយ “ការឃុបឃិតគ្នា” រវាងទីក្រុងតៃប៉ិ និងទីក្រុងវ៉ាស៊ីនតោន ៕
មតិយោបល់