ព័ត៌មានជាតិ

ជិះម៉ូតូមិនប្រយ័ត្ន បុកពីក្រោយរថយន្តចតចោលលើដងផ្លូវ ស្លាប់ភ្លាមមួយប៉ព្រិចភ្នែក

កែប: លោកអធិការស្រុកដំណាក់ចង្អើរបានប្រាប់ Post News ថា មានករណីគ្រោះថ្នាក់ចរាចរណ៍កើតឡើងរវាងម៉ូតូ និងរថយន្ដ ដែលបានចតនៅលើផ្លូវ ជាតិលេខ៣៣ ខាងលិចខ្លោងទ្វារសាលារៀនពងទឹក ប្រហែល៦០ម៉ែត្រ ។

ហេតុការណ៍នេះបានកើតឡើងកាលពីវេលាម៉ោង ១០និង៤៥នាទីយប់ថ្ងៃទី២៣ ខែមីនា ឆ្នាំ២០១៧ ស្ថិតនៅភូមិអូរដូង ឃំុពងទឹកស្រុកដំណាក់ចង្អើរ​ ខេត្ដកែប ។

លោកអធិការបានបន្តថា មុនពេលកើតហេតុ មានម៉ូតូហុងដាសេ១២៥ពណ៌ខ្មៅ ឆ្នាំ២០១៥មួយគ្រឿង ស្លាកលេខ ព្រះសីហនុ១D៨១៧៣ បើកបរដោយឈ្មោះ ខេង ទោង ភេទប្រុស អាយុ៥៥ ឆ្នាំ រស់នៅភូមិអន្ទង់ស ឃុំពងទឹក ស្រុកដំណាក់ចង្អើរ ខេត្ដកែប បើកបរពីលិចទៅកើត ដោយផ្លូវងងឹតមើលមិនឃើញក៏បុកពីក្រោយរថយន្តមួយគ្រឿង (បណ្ដាលឲ្យស្លាប់នៅនឹងកន្លែង) ដែលរថយន្ដនោះម៉ាកហីុយាន់ដាយពណ៌ស ស្លាកលេខ ភ្នំពេញ៣A៨៤៤៦ ចតនៅលើផ្លូវជាតិលេខ៣៣ ។ ក្រោយពេលកើតហេតុ អ្នកបើកបររថយន្ដ បានរត់គេចខ្លួនបាត់ ។

បច្ចុប្បន្ន សាកសពត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី ចំណែករថយន្ដ និងម៉ូតូយកមករក្សាទុកនៅអធិការដ្ឋាននគរបាលស្រុកដំណាក់ចង្អើរ ។

មតិយោបល់