មណ្ឌលគិរី: លោកអធិការរងស្រុកកែវសីម៉ា បានប្រាប់ Post News ថា មានករណីឆេះផ្ទះអស់មួយខ្នង ដែលមានទទឹង ៦ម៉ែត្រ និងបណ្តោយ ៧ម៉ែត្រ ប្រក់ស័ង្កសី និងស្រូវ៤០ បេ ខូចខាតទាំងស្រុង កាលពីវេលាម៉ោង ១០និង០៥នាទីយប់ ថ្ងៃទី ២៣ ខែ មីនា ឆ្នាំ ២០១៧ នៅចំណុចភូមិខ្ញែង ឃុំចុងផ្លាស់ ស្រុកកែវសីម៉ា ខេត្តមណ្ឌលគិរី ។

លោកអធិការរងបានបន្តថា ក្នុងនោះក៏មានមនុស្សផងដែរ ចំនួន០២នាក់ ស្រីម្នាក់ ដែលជនរងគ្រោះទី១មានឈ្មោះ យុឹង ផល្លី ភេទប្រុស អាយុ៤ឆ្នាំ ជនជាតិភ្នង និងជនរងគ្រោះទី២មានឈ្មោះ យុឹង ផល្លា ភេទស្រី អាយុ២ឆ្នាំ ជនជាតិភ្នង ត្រូវបានឆេះស្លាប់សល់តែឆ្អឹង ។ រីឯឪពុកម្តាយជនរងគ្រោះមានឈ្មោះ ពាក យុឹម អាយុ២៥ឆ្នាំ ភេទប្រុស ជនជាតិភ្នង ត្រូវជាឪពុក និងម្តាយមានឈ្មោះ ប៊ុន ភន ភេទស្រី អាយុ២៤ឆ្នាំ ជនជាតិភ្នង ។

លោកអធិការរងបានបន្តទៀតថា មុនពេលកើតហេតុ ឪពុកម្តាយបានទុកកូនទាំង២ឲ្យដេកនៅផ្ទះ ចំនែកឪពុកម្តាយទៅពិភាក្សាការក្មួយនៅផ្ទះបងស្រីទល់មុខគ្នាចម្ងាយ៥០ម៉ែត្រពីផ្ទះដែលឆេះ ។ ខណ:នោះមានភ្លើងឆេះបងប្អូនឃើញក៏ស្រែកឆោឡោ តែភ្លើងឆេះខ្លាំងទោះពន្លត់យ៉ាងណាក៏មិនរលត់ រហូតឆេះខ្ទេចស្លាប់ទាំងកូនប្រុសស្រី២នាក់ទៀត ។

បច្ចុប្បន្នក្រោយពីសមត្ថកិច្ចចុះធ្វើកំណត់ហេតុ និងធ្វើកោសលវិច័យ សមត្ថកិច្ចបានប្រគល់ឆ្អឹងសាកសពក្មេងទាំង២ឲ្យក្រុមគ្រួសារធ្វើបុណ្យតាមប្រពៃណី ៕