ភ្នំពេញៈ នៅរសៀលថ្ងៃទី២៤ ខែមីនា ឆ្នាំ២០១៧នេះ លោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងប្រាប់ក្រុមអ្នកសារព័ត៌មានតាម Telegram ថា«ក្រោយពីបានបញ្ចប់ការសួរចម្លើយ និងពិភាក្សាដេញដោលចំពោះមុខ លោក ប៊ុន ធី ជាចៅក្រមស៊ើបសួរ បានសម្រេចឃុំខ្លួនបណ្តោះអាសន្នលើឈ្មោះ ហ៊ុយ ហឿន ភេទប្រុស អាយុ ៣៨ ឆ្នាំ ជានាយរងផ្នែក ការិយាល័យកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច និងដាក់នៅក្រោមការពិនិត្យលើឈ្មោះ ឯម កុសល (គេចខ្លួន) ពីបទ វិតិក្រម តាមមាត្រា ៥៩២ ៥៩៣ ក្រមព្រហ្មទណ្ឌ និងមាត្រា ៣២ នៃច្បាប់ប្រឆាំងអំពើពុករលួយ ហើយបញ្ជូនជនត្រូវចោទឈ្មោះ ហ៊ុយ ហឿន ទៅមណ្ឌលឃុំខ្លួនតាមនីតិវិធី»

គួររំលឹកថា ជនជាប់ចោទ ឈ្មោះ ហ៊ុយ ហឿន ភេទប្រុស អាយុ ៣៨ឆ្នាំ មានតួនាទីជានាយរងផ្នែកការិយាល័យកម្មសិទ្ធិបញ្ញា នៃនាយកដ្ឋាននគរបាលប្រឆាំងបទល្មើសសេដ្ឋកិច្ច ត្រូវបានអង្គភាពប្រឆាំងអំពើពុករលួយឃាត់ខ្លួន និងបញ្ជូនទៅកាន់តុលាការកាលពីរសៀលថ្ងៃទី២៣ មីនា ២០១៧ម្សិលមិញ៕