បន្ទាយមានជ័យ: លោកនាយរងប៉ុស្តិ៍សង្កាត់ពន្លា បានប្រាប់Post Newsថា មានហេតុការណ៍ភ្ញាក់ផ្អើលមួយបានកើតឡើង បន្ទាប់ពីក្មេងប្រុស អាយុ៤ឆ្នាំម្នាក់ចុះលេងទឹកស្ទឹង បណ្តាលឲ្យលង់ទម្រាំតែម្តាយដឹង កូនលង់ស្លាប់បាត់ទៅហើយ។

ហេតុការណ៍នេះបានកើតឡើងកាលពីវេលាម៉ោង៣និង៣០នាទី រសៀលថ្ងៃទី២៥ ខែមីនា ឆ្នាំ២០១៧ ស្ថិតនៅចំណុចខារ៉ាអូខេ១៦៨ ជាប់មាត់ស្ទឹងខ្នន ក្នុងភូមិក្បាលស្ពាន សង្កាត់ពន្លា ក្រុងសិរីសោភ័ណ ខេត្តបន្ទាយមានជ័យ។

សមត្ថកិច្ចបានឲ្យដឹងថា សាកសពក្មេងប្រុសរងគ្រោះមានឈ្មោះ ជាតិ គវ ភេទប្រុស អាយុ៤ឆ្នាំ មានឪពុកឈ្មោះ មន្នី ជាតិ ម្តាយឈ្មោះ មួន និត ស្នាក់នៅភូមិកើតហេតុខាងលើ។

នៅមុនពេលកើតហេតុ មានគេបានឃើញក្មេងប្រុសរងគ្រោះខាងលើនេះ បានចុះទៅលេងទឹកមាត់ស្ទឹង ដោយម្តាយពុំបានដឹង លុះដល់បាត់កូនអស់រយ:ពេលប្រហែលកន្លះម៉ោង ម្តាយក៏សង្ស័យនាំគ្នាចុះទៅរាវរកក្នុងស្ទឹងជាប់ផ្ទះ ស្រាប់តែឃើញនៅក្នុងស្ទឹង ទើបប្រញាប់ស្រង់កូនឡើងមកលើគោក តែជាអកុសលកូនបានស្លាប់បាត់ទៅហើយ ។

បច្ចុប្បន្នសពក្មេងប្រុសរងគ្រោះ​ត្រូវបានសមត្ថកិច្ចធ្វើកំណត់ហេតុ ប្រគល់ទៅឲ្យក្រុមគ្រួសារធ្វើបុណ្យតាមប្រពៃណី៕