ព័ត៌មានជាតិ

BMW បុកក្បាលព្រួញចែកទ្រូងផ្លូវបាក់ខ្ទាតចេញពីគ្នា ចំណែករថយន្តបាក់កាឡេអូសជិត៥០ម៉ែត្រ

ភ្នំពេញ: រថយន្ដស៊េរីទំនើបម៉ាក BMW មួយគ្រឿង បើកក្នុងល្បឿនលឿនមិនប្រយ័ត្ន ជ្រុលបុករបាំងថ្មចែកទ្រូងផ្លូវពេញទំហឹង បណ្ដាលឲ្យខូចខាតអស់១កង់ ចំណែករថយន្ដដាច់កាឡេកង់មុខផ្នែកខាងឆ្វេង បន្តដំណើរទៅមុខលែងរួច។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១រំលងអធ្រាត្រ ឈានចូលថ្ងៃទី២៨ ខែមីនា ឆ្នាំ២០១៧ នៅចំណុចស្តុបផ្សារថ្មី តាមបណ្ដោយផ្លូវព្រះមុន្នីវង្ស ក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានប្រាប់ភ្នាក់ងារ Post News ថា នៅមុនពេលកើតហេតុ គេបានឃើញរថយន្ដស៊េរីទំនើប ម៉ាក BMW ពណ៌ខ្មៅ ពាក់ស្លាកលេខ ភ្នំពេញ 2AG-1099 បើកបរដោយបុរសនារីជនជាតិចិន២នាក់ ធ្វើដំណើរតាមបណ្ដោយផ្លូវព្រះមុន្នីវង្ស ទិសដៅពីត្បូងទៅជើងក្នុងល្បឿនលឿន ហើយពេលមកដល់ចំណុចកើតហេតុ មិនបន្ថយល្បឿនក៏ជ្រុលបុករបាំងថ្មចែកទ្រូងផ្លូវពេញទំហឹងបណ្ដាលឲ្យរបាំងថ្មខូចខាត១កង់ខ្ទាតចេញពីគ្នា។ ចំណែករថយន្ដដាច់កាឡេកង់ខាងមុខផ្នែកខាងឆ្វេង អូសជិត៥០ម៉ែត្រ ទើបអស់ល្បឿនទៅមុខលែងរួច តែមិនបណ្ដាលឲ្យអ្នកជិះនៅក្នុងរថយន្ដរងរបួសនោះទេ។

ក្រោយពីកើតហេតុ ម្ចាស់រថយន្ដបានបើកទ្វាររថយន្ដចុះគេចខ្លួនបាត់ ដោយបន្សល់រថយន្ដទុកនៅកន្លែងកើតហេតុ។ ក្រោយមកទើបមានកម្លាំងសមត្ថកិច្ចមូលដ្ឋានចុះដល់កន្លែងកើតហេតុ ហើយបានទំនាក់ទំនងទៅកម្លាំងជំនាញចុះធ្វើការវាស់វែងស្ទូចយករថយន្ដបង្កទៅរក្សាទុកនៅការិយាល័យចរាចរណ៍រាជធានីភ្នំពេញដោះស្រាយតាមផ្លូវច្បាប់៕

មតិយោបល់