ភ្នំពេញ: ភ្នាក់ងារPost Newsបានឲ្យដឹងថា សិស្សវិទ្យាល័យសាមគ្គីជាស៊ីមចំនួន២នាក់ ត្រូវបានសមត្ថកិច្ចចាប់ឃាត់ខ្លួនភ្លាមៗ ក្រោយពីធ្វើសកម្មភាពឆក់ទូរសព្ទស្មាតហ្វូនម៉ាក BLU បានសម្រេច តែជិះជ្រុលទៅបុកតាម៉ូតូឌុប ។

កាលពីម៉ោង៣និង៥០នាទីរសៀល ថ្ងៃទី២៨ ខែមិនា ឆ្នាំ២០១៧ មានករណីឆក់ទូរសព្ទដៃស្មាតហ្វូននៅចំណុចខាងមុខសាលាភាសាបរទេស ហៅកាត់ IFL ផ្លូវ២៦១ កែងនិងផ្លូវសហព័ន្ធរុស្សី សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។

យោងតាមរបាយការណ៍របស់សមត្ថកិច្ចបានឲ្យដឹងថា ជនសង្ស័យមានឈ្មោះ សុទ្ធ សុខតារា ភេទប្រុស អាយុ១៨ឆ្នាំ ជាអ្នកឌុបនិងធ្វើសកម្មភាពឆក់ និងឈ្មោះ សៀង សំណាងរិទ្ធី ភេទប្រុស អាយុ១៧ឆ្នាំ ។ ហើយជនសង្ស័យទាំង២នាក់ជាសិស្សវិទ្យាល័យជាស៊ីមសាមគ្គី ដោយជិះម៉ូតូម៉ាកឃ្លីគ ពណ៌សលាយទឹកមាស ស្លាកលេខ ភ្នំពេញ 1FB-7552 ។ ចំណែកនារីរងគ្រោះសុំមិនបញ្ចេញឈ្មោះ ជាបុគ្គលិកក្រុមហ៊ុនឯកជនមានអក្សរកាត់ OMG ជិះម៉ូតូម៉ាកស្កុបពី ពណ៌ស ស្លាកលេខ ភ្នំពេញ 1CK-3979 ។

យោងតាមការរៀបរាប់ពីនារីរងគ្រោះបានប្រាប់ថា គាត់បានជិះម៉ូតូដោយទុកទូរស័ព្ទម៉ាក BLU នៅក្នុងផតខាងមុខ និងធ្វើដំណើរពីត្បូងទៅជើងមកដល់ផ្លូវសហព័ន្ធរុស្សីក៏បត់ស្តាំស្រាប់តែមានក្មេងៗជនសង្ស័យចំនួន២នាក់បានលូកដៃយកទូរសព្ទហើយជិះគេចខ្លួនបានបត់ទៅខាងឆ្វេងដៃ ស្រាប់តែជ្រុលទៅបុកម៉ូតូឌុបដួលតែម្តង ។

ទើបអ្នកឃើញហេតការណ៍មានទាំងសន្តិសុខឯកជន អ្នករត់រ៉ឺម៉ក ជួយចាប់បានភ្លាមៗប្រគល់ជូននរគបាលប៉ុស្តិ៍រដ្ឋបាលសង្កាត់ទឹកល្អក់ទី១យកទៅសាកសួរដើម្បីចាត់ការតាមផ្លូវច្បាប់ ។

បច្ចុប្បន្នជនសង្ស័យទាំង២នាក់ជាសិស្សវិទ្យាល័យជាស៊ីមសាមគ្គី ត្រូវបានកម្លាំងនាំមកឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌទួលគោក ដើម្បីកសាងសំណុំរឿងចាត់ការតាមនីតិវិធី ៕