ភ្នំពេញ: ភ្នាក់ងារPost Newsបានឲ្យដឹងថា ករណីឆក់កាបូបបានហើយធ្លាក់ពីលើម៉ូតូចាប់បានម្នាក់ក្នុងចំណោម៣នាក់ ត្រូវសមត្ថកិច្ចចាប់ឃាត់ខ្លួនរួមទាំងវត្ថុតាង តែបាត់ទូរសព្ទណូគាអិនចុចពិលមួយគ្រឿង ។

ករណីឆក់កាបូបនេះកើតឡើងនៅចំណុចផ្លូវសហព័ន្ធរុស្សី ចុះពីលើស្ពានអាកាស៧មករា ស្ថិតនៅសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ នៅម៉ោង៦និង២០នាទីល្ងាច ថ្ងៃទី២៨ ខែមិនា ឆ្នាំ២០១៧ ។

ជនសង្ស័យមានឈ្មោះ ម៉ន គីមហុង ភេទប្រុស អាយុ១៥ឆ្នាំ មុខរបរមិនពិតប្រាកដ ស្នាក់នៅម្តុំផ្សារថ្មី ខណ្ឌដូនពេញ រាជធានីភ្នំពេញ ជាអ្នកឆក់និងអង្គុយខាងក្រោយ ។

រីឯស្ត្រីរងគ្រោះមានឈ្មោះ ឈូ ស្រីពៅ ហៅស្រីពៅ ភេទស្រី អាយុ៣៣ឆ្នាំ មុខរបរបុគ្គលិកក្រមហ៊ុន ស្នាក់នៅផ្ទះជួល ផ្លូវលំ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ជិះម៉ូតូម៉ាកវីវ៉ា ពណ៌ខ្មៅ ស្លាកលេខ ភ្នំពេញ 1G-0664 ។

តាមសំដីស្ត្រីរងគ្រោះបានឲ្យដឹងថា គាត់បានចាកចេញពីធ្វើការងារនៅក្រុមហ៊ុនក្នុងបំណងទៅរៀននៅសាកលវិទ្យាល័យភូមិន្ទភ្នំពេញ RUPP បានជិះម៉ូតូតាមបណ្តោយផ្លូវសហព័ន្ធរុស្សី ពីកើតទៅលិច មកដល់ចំណុចស្ពានអាកាស៧មករា ពេលចុះមកមិនទាន់ផុតផង ស្រាប់តែមានជនសង្ស័យចំនួន៣នាក់ ជិះម៉ូតូឌ្រីមសងសេ១២៥ ពណ៌ខៀវ សេរី០១៥ មិនចាំស្លាកលេខ ដោយជិះគ្នាចំនួន២នាក់ ហើយអ្នកអង្គុយខាងក្រោយបានធ្វើសកម្មភាពឆក់កាបូបស្ពាយតូចពណ៌ខ្មៅបានសម្រេច តែដោយផ្លូវចង្អៀត ជនសង្ស័យអ្នកបើកខាងមុខអកសឺជាមួយរថយន្តព្យាយាមជិះគេចក៏ធ្លាក់អ្នកជិះពីខាងក្រោយនិងកាបូបទើបឆក់បាន ត្រូវបានប្រជាពលរដ្ឋជួយចាប់ឃាត់ខ្លួន និងយកកាបូបមកវិញ តែបានជ្រុះទូរសព្ទណូគាអិនចុចពិលបាត់ ។

តាមសំដីជនសង្ស័យបានសារភាពថា ខ្លួនពិតជាបានឆក់កាបូបពីស្ត្រីរងគ្រោះមែន ដោយបានជិះពីខាងក្រោយឈ្មោះ តូណា ភេទប្រុស អាយុ១៥ឆ្នាំ ជាម្ចាស់ម៉ូតូនិងអ្នកបើក និងម្នាក់ទៀតមានឈ្មោះ អាធី ភេទប្រុស អាយុ១៦ឆ្នាំ ជិះម៉ូតូ Let’s ពណ៌ស មិនចាំស្លាកលេខ ជាអ្នកបិតគូទ ។

បច្ចុប្បន្នជនសង្ស័យត្រូវកម្លាំងឃុំខ្លួនបណ្តោះអាសន្ននៅអធិការដ្ឋាននរគបាលខណ្ឌទួលគោក ដើម្បីសាកសួរនិងកសាងសំណុំរឿងចាត់ការតាមនីតិវិធី ៕

//youtu.be/GZ4GqpQmOZQ