ភ្នំពេញៈ បុរសម្នាក់បានអះអាងថាខ្លួនជាមន្ត្រីនគរបាល ហើយត្រូវប្អូនថ្លៃរបស់ខ្លួនមិនខ្លាចថែមទាំងបានកាប់និងខាំរូបគាត់បណ្តាលឲ្យរងរបួសកដៃ ទាំងសងខាង និងមានស្នាមខាំក្រោមដោះខាងស្តាំ រត់មកប្តឹងនគរបាលប៉ុស្តិ៍ចោមចៅឲ្យជួយអន្តរាគមន៍។

ហេតុការណ៍នេះបានកើតឡើងកាលពីវេលាម៉ោង៤ និង៣០នាទី រសៀលថ្ងៃទី២៨ខែមីនា ឆ្នាំ២០១៧ ស្ថិតនៅក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យរាជធានីភ្នំពេញ។

បុរសដែលអះអាងថាខ្លួនជាមន្ត្រីនគរបាល ហើយត្រូវប្អូនថ្លៃកាប់និងខាំនោះមានឈ្មោះ វ៉ាន់ ចាន់រ៉ាវុធ អាយុ៣៤ឆ្នាំ មុខរបរជាមន្ត្រីនគរបាល ស្នាក់នៅភូមិព្រៃល្វាសង្កាត់ចោមចៅ ខណ្ឌពោធិ៍សែនជ័យ។ ចំណែកបុរសជាប្អូនថ្លៃមានឈ្មោះ ឈុន លាងហេង ហៅផែន អាយុ៣៣ឆ្នាំ មុខរបរនៅផ្ទះ ស្នាក់នៅភូមិកើតហេតុខាងលើ។

ប្រភពព័ត៌មានពីជនរងគ្រោះបានឲ្យដឹងថា នៅមុនពេលកើតហេតុ គាត់បានចូលបន្ទប់ទឹកងូតទឹក លុះមួយសន្ទុះក្រោយមកក៏ស្រាប់តែប្អូនថ្លៃរូបនោះ កាន់កាំបិតបុង័តោ ចូលទៅកាប់ និងខាំរូបគាត់ តែដោយសារគាត់មានកម្លាំងមាំមួន គេចនិងបានរើបម្រាស់ ទាន់ពេលវេលា ទើបមិនបណ្តាលឲ្យរងរបួសធ្ងន់លើសពីនេះនោះទេ។

ទោះជាយ៉ាងណា បុរសរងគ្រោះបានរងរបួសត្រូវកដៃទាំងសងខាង និងមានស្នាមលើពោះខាងឆ្វេង និងមានស្នាមជនសង្ស័យខាំកញ្ចុះដោះខាងស្តាំ បណ្តាលឲ្យរងរបួសផងដែរ។

ជនរងគ្រោះរៀបរាប់ប្រាប់ភ្នាក់ងារ Post News ថា ជនបង្កមិនសូវត្រូវជាមួយបងប្អូននោះទេ ជាក់ស្តែងរូបគាត់និងជនសង្ស័យ ជាប្អូនថ្លៃ ធ្លាប់បានប្តឹងផ្តល់គ្នាម្តងដែរកាលពីមុន តែរឿងនេះកន្លងទៅយូរហើយ។

ចំពោះករណីប្អូនថ្លៃកាប់ដោយកាំបិតបុង័តោ និងខាំបណ្តាលឲ្យបងថ្លៃមានរបួសនេះ គេមិនដឹងថា បណ្តាលមកពីគំនុំ ឬយ៉ាងណានោះទេ ព្រោះនៅពេលដែលភ្នាក់ងារ Post News សួរថា បណ្តាលមកពីរឿងអ្វី? ជនរងគ្រោះបានឆ្លើយត្រឹមតែថា ប្អូនថ្លៃយកកាំបិតតាំតោកាប់លើរូបគាត់ ហើយបានខាំដោះខាងស្តាំ របស់គាត់ជាប់ ប៉ុន្តែនៅពេលដែលគាត់រើប្រតាយប្រតប់ ហើយបានចាប់ច្របាច់ក ទើបជនបង្កជាប្អូនថ្លៃលែងខាំ។

ក្រោយពេលកើតហេតុជនរងគ្រោះបានមកដាក់ពាក្យបណ្តឹងនៅប៉ុស្តិ៍ចោមចៅដើម្បីឲ្យសមត្ថកិច្ចជួយអន្តរាគមន៍ចាត់ការតាមផ្លូវច្បាប់៕

https://youtu.be/uQwpZBeCUbA