កណ្តាល: នៅរសៀលថ្ងៃទី២៩ ខែមីនា ឆ្នាំ២០១៧ មន្ត្រីការិយាល័យនគរបាលចរាចរណ៍ផ្លូវគោក នៃស្នងការនគរបាលខេត្តកណ្តាល បានបញ្ជូនជនបង្កដែលបើកបររថយន្តស៊េរីទំនើបប៉ះគ្នា រួចបន្តល្បឿនបុកបង្គោលភ្លើង និងម៉ូតូមួយគ្រឿងបង្ករបួសធ្ងន់ម្នាក់ មកតុលាការដើម្បីចាត់ការតាមនីតិវិធីច្បាប់។ ឥឡូវនេះជនបង្ក កំពុងស្ថិតនៅក្រោមការសាកសួររបស់តំណាងអយ្យការ។

សូមបញ្ជាក់ថា គ្រោះថ្នាក់ចរាចរណ៍មួយបង្កឲ្យមានការភ្ញាក់ផ្អើលដល់អ្នកធ្វើដំណើរឈប់មើលពេញផ្លូវ ខណ:សុទ្ធតែរថយន្តស៊េរីទំនើបបើកក្នុងល្បឿនលឿនប៉ះគ្នា ហើយបន្តទៅបុកម៉ូតូអូសនៅក្រោមរថយន្ត រួចទៅបុកបង្គោលភ្លើង បណ្តាលឲ្យយុវជនម្នាក់បាក់ដៃរងរបួសធ្ងន់ កាលពីវេលាម៉ោង១២ និង២៥នាទី ថ្ងៃទី២៨ ខែមីនា ឆ្នាំ២០១៧ ទល់មុខហាងកាហ្វេយីហោ ហេង ហេង ស្ថិតក្នុងភូមិដើមគរ សង្កាត់ដើមមាន ក្រុងតាខ្មៅ ខេត្តកណ្តាល។

ប្រភពពីនគរបាលចរាចរណ៍បានប្រាប់ Post News ថា ជនរងគ្រោះមានឈ្មោះ លន់ ពន្លឺ ហៅទោ ភេទប្រុស អាយុ១៨ឆ្នាំ មានទីលំនៅភូមិបឹងខ្យាង ឃុំបឹងខ្យាង ស្រុកកណ្តាលស្ទឹង មុខរបរអ្នករត់តុ។ រីឯជនបង្កមានឈ្មោះ សយ ប៉ូរា ភេទប្រុស អាយុ២០ឆ្នាំ មានទីលំនៅផ្ទះជួល សង្កាត់ចាក់អង្រែលើ ខណ្ឌមានជ័យ មុខរបរជាងរថយន្ត រីឯភាគីម្ខាងទៀតមិនទាន់ស្គាល់អត្តសញ្ញាណទេ។

ប្រភពដដែលបន្តថា នៅមុនពេលកើតហេតុ មានរថយន្តស៊េរីទំនើបមួយគ្រឿងម៉ាកឡិចស៊ីស GS300 ពណ៌ស ពាក់ស្លាកលេខ ភ្នំពេញ 2AR-7989 បើកបរដោយយុវជនមិនស្គាល់ឈ្មោះ ក្នុងទិសដៅពីជើងទៅត្បូង គឺពីភ្នំពេញទៅតាខ្មៅ លុះមកដល់ចំណុចកើតហេតុស្រាប់តែមានរថយន្តមួយគ្រឿង ម៉ាកសឺដេស ពណ៌ទឹកប្រាក់ ពាក់ស្លាកលេខ ភ្នំពេញ 2K-9446 បើកបរដោយឈ្មោះ សយ ប៉ូរា ចេញពីយានដ្ឋានជួសជុលរថយន្តមួយកន្លែង ក្នុងល្បឿនលឿនដែលមានទិសដៅស្របគ្នា ហើយក៏ស្រាប់តែស្ទុះទៅបុករថយន្ត ឡិចស៊ីស ហើយបន្តទៅបុកម៉ូតូមួយគ្រឿងម៉ាកស៊ុយសូគីលែត ពណ៌សលាយខ្មៅ ពាក់ស្លាកលេខ ភ្នំពេញ 1DE-0434 បណ្តាលឲ្យអូសម៉ូតូ និងមនុស្សនៅក្រោមរថយន្ត រហូតបាក់ដៃ និងរងរបួសធ្ងន់ ហើយបន្ថែមទៅបុកបង្គោលភ្លើង ទើបធ្វើឲ្យរថយន្តរងការខូចខាតមួយកំណាត់មុខទៅមុខលែងរួច។

ភ្លាមៗនោះ ជនរងគ្រោះ ត្រូវបានប្រជាពលរដ្ឋ នៅជិតកន្លែងកើតហេតុ ដឹកយកទៅសង្គ្រោះនៅមន្ទីរពេទ្យ ជ័យជម្នះ។ ចំណែកឯភាគីរថយន្តស៊េរីទំនើបទាំងសងខាងចរចារគ្នា ក្នុងទឹកប្រាក់១,០០០ដុល្លារ តែមិនត្រូវគ្នា ទើបឲ្យសមត្ថកិច្ចចរាចរណ៍យករថយន្តទាំង២គ្រឿង និងម៉ូតូទៅរក្សាទុកនៅអធិការដ្ឋាននគរបាលក្រុងតាខ្មៅ៕