ភ្នំពេញ: កម្លាំងសមត្ថកិច្ចខណ្ឌឫស្សីកែវ ធ្វើការចុះបង្ក្រាបទីតាំងជួញដូរ និងចែកចាយគ្រឿងញៀនមួយកន្លែង ដោយឃាត់បានជនសង្ស័យម្នាក់ ដកហូតថ្នាំញៀនបានមួយចំនួន។

ការចុះបង្រ្កាបនេះបានធ្វើឡើងកាលពីវេលាម៉ោង៣និង៣០នាទីរសៀល ថ្ងៃទី២៩ ខែមីនា ឆ្នាំ២០១៧ ដែលស្ថិតនៅចំណុចផ្ទះគ្មានលេខ ក្រុម៣ ភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យមានឈ្មោះ ធឿន អន ភេទប្រុស អាយុ៣៣ឆ្នាំ មានមុខរបររត់ម៉ូតូ ស្នាក់នៅកន្លែងកើតហេតុខាងលើ។

ប្រភពដដែលបានបន្តថា នៅក្នុងប្រតិបត្តិការនេះ គឺកម្លាំងសមត្ថកិច្ចយើងបានធ្វើស្រាវជ្រាវរយ:ពេលយូរណាស់មកហើយ រហូតមកដល់ថ្ងៃនេះ ទើបសមត្ថកិច្ច យើងបានបើកប្រតិបត្តិការចុះបង្ក្រាបទីតាំងខាងលើ ដោយបានឃាត់ខ្លួនជនសង្ស័យម្នាក់ ព្រមទាំងដកហូតម្សៅក្រាមពណ៌សថ្លាចំនួន ៤កញ្ចប់, ឧបករណ៍ប្រើប្រាស់មួយចំនួន, ដំបងវែងចំនួន១ដើម និងម៉ូតូចំនួន១គ្រឿង។ ក្រោយមក សមត្ថកិច្ចយើងបាននាំខ្លួនជនសង្ស័យខាងលើទៅធ្វើការសាកសួរនៅប៉ុស្តិ៍នគរបាលរដ្ឋបាលគីឡូម៉ែត្រលេខ៦។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវបានសមត្ថកិច្ចឃុំខ្លួនជាបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីធ្វើការសាកសួរនិងកសាងសំណុំរឿង បញ្ជូនទៅកាន់តុលាការ ចាត់ការបន្តតាមនីតិវិធីច្បាប់៕