សៀមរាប: ហេតុការណ៍ភ្ញាក់ផ្អើលមួយបានកើតឡើង បន្ទាប់ពីមានការឭសូរគ្រាប់កាំភ្លើងផ្ទុះចំនួន១គ្រាប់ បានបន្លឺឡើង និងបណ្តាលឲ្យបុរសម្នាក់រងរបួសធ្ងន់ សន្លប់ក្បែរចិញ្ចើមផ្លូវ។

ហេតុការណ៍នេះបានកើតឡើងកាលពីទៀបភ្លឺ ឈានចូលថ្ងៃទី៣១ ខែមីនា ឆ្នាំ២០១៧ ស្ថិតនៅចំណុច ច្រកចូលវត្តត្រាំនាគ ក្នុងភូមិត្លុកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។

ជនរងគ្រោះដែលត្រូវគេបាញ់ប្រហារខាងលើនេះ មានឈ្មោះ ចោម ចាន់រ័ត្ន អាយុ៣២ឆ្នាំ មុខរបរជា DJ នៅក្នុងភោជនីយដ្ឋានឆែល ស្ថិតក្នុងក្រុងសៀមរាប ក្បែរនឹងផ្សារចាស់។

ចំពោះមូលហេតុបណ្តាលមកពីអ្វីឲ្យប្រាកដនោះគេនៅមិនទាន់ដឹងនៅឡើយ ព្រោះសមត្ថកិច្ចកំពុងតែធ្វើការស្រាវជ្រាវ ចំណែកជនរងគ្រោះត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ៕