ព្រះសីហនុ ៖ នាវាធុនធំមួយគ្រឿង នៅថ្ងៃទី៥ ខែមេសា ឆ្នាំ ២០១៦ បាននាំភ្ញៀវទេសចរចម្រុះជាតិសាសន៍ជិត ៤,០០០នាក់ ចូលចតនៅកំពង់ផែអន្តរជាតិខេត្តព្រះសីហនុ ដើម្បីធ្វើទស្សនកិច្ចនៅព្រះរាជាណាចក្រកម្ពុជារយ:ពេលមួយថ្ងៃ ។
លោកវរសេនីយ៍ឯក ស៊ាង ឡេង ប្រធានប៉ុស្តិ៍នគរបាលច្រកទ្វារកំពង់ផែអន្តរជាតិខេត្តព្រះសីហនុ បានឲ្យដឹងថា នាវាទេសចរបរទេសធុនយក្សមួយគ្រឿងមានឈ្មោះ Queen Mary សញ្ជាតិ BERMUDA បាននាំភ្ញៀវទេសចរចម្រុះជាតិសាសន៍ជិត៤,០០០នាក់ ចូលចតកំពង់ផែស្វយ័តខេត្តព្រះសីហនុ ក្នុងនោះភ្ញៀវទេសចរចំនួន ២,៣៩៨នាក់ ស្រី១,២៦៨នាក់ មាន៣៥សញ្ជាតិផ្សេងគ្នា និងមាននាវិកសរុប ១,.២៧១នាក់ ស្រី២១១នាក់ មាន ៥៧សញ្ជាតិ បានធ្វើដំណើរតាមនាវា
ទេសចរណ៍បរទេស Queen Mary មកពីប្រទេសថៃ ចូលចតកំពង់ផែអន្តរជាតិខេត្តព្រះសីហនុ នៅវេលាម៉ោង ៧និង៤០នាទីព្រឹក ក្នុងដំណើរ ទស្សនាចរនៅក្នុងទឹកដីនៃព្រះរាជាណាចក្រកម្ពុជារយះពេលមួយថ្ងៃ មុននឹងធ្វើដំណើចាកចេញពីប្រទេសកម្ពុជាឆ្ពោះទៅកាន់ប្រទេសសឹង្ហ បូរី នៅវេលាម៉ោង ១៩ល្ងាចថ្ងៃដដែល ។
លោកវរសេនីយឯក ស៊ាង ឡេង បានបន្តទៀតថា នាវាទេសចរណ៍ Queen Mary បាននាំភ្ញៀវទេសចរណ៍ចម្រុះជាតិសាសន៍ចូលចតបោះយុទ្ធការក្នុងលំហរសមុទ្រចម្ងាយប្រមាណ ២ម៉ាយពីកំពង់ផែអន្តរជាតិខេត្តព្រះសីហនុ ហើយភ្ញៀវធ្វើដំណើរឡើងគោកតាមនាវាចម្លងតូចៗជាច្រើនគ្រឿងផ្សេងទៀត ភ្ញៀវទេសចរដែលធ្វើដំណើរតាមនាវា Queen Mary ភាគច្រើនជាមនុស្សដែលមានវ័យចំណាស់ ។
មន្ត្រីប៉ុស្តិ៍នគរបាលច្រកទ្វាកំពង់ផែ អន្តរជាតិខេត្តព្រះសីហនុ បានឱ្យដឹងថា នៅដើមឆ្នាំ២០១៦ មាននាវាទេសចរបរទេសចូលចត បោះយុទ្ធការនៅខេត្តព្រះសីហនុ មានការកើនឡើងជាបន្តបន្ទាប់ ហើយការកើនឡើង ដោយសារតែប្រទេសកម្ពុជា មានការអភិវឌ្ឍរីកចម្រើន ពិសេសកម្ពុជាមានសន្តិសុខ សុវត្ថិភាពធានាក្នុងដំណើរកម្សាន្ត របស់ភ្ញៀវទេសចរជាតិ និងអន្តរជាតិមកលេងកម្សាន្តនៅព្រះរាជាណាចក្រកម្ពុជា ម្យ៉ាងទៀតកត្តាបរិស្ថាន អនាម័យក៏ជាចំណុចក្នុងការទាក់ទាញភ្ញៀវទេសចរមកលេងកម្សាន្តនៅព្រះរាជាណាចក្រកម្ពុជាកាន់តែច្រើនឡើង ម្យ៉ាងខេត្តព្រះសីហនុមានការអភិវឌ្ឍន៍រីកចម្រើន ជាបន្តបន្ទាប់ សាក សម ជាតារារ:នាទិសនិរតី ៕
មតិយោបល់