កំពត ៖ ជនសង្ស័យ២នាក់ ជាមុខសញ្ញាប្លន់ប្រដាប់អាវុធយ៉ាងសកម្មប្រចាំខេត្តកំពត ត្រូវបានកម្លាំងសមត្ថកិច្ច បានសហការគ្នា ក្របួចជាប់។
ការបង្ក្រាបនេះ ធ្វើឡើងកាលពីថ្ងៃទី០៤ ខែមេសាឆ្នាំ ២០១៦ ដោយកម្លាំងសមត្ថកិច្ចមូលដ្ឋាន បានសហការគ្នា ក្រោមបញ្ជាផ្ទាល់ពីលោកឧត្តមសេនីយ៍ត្រី ម៉ៅ ច័ន្ទ មធុរិទ្ធ ស្នងការខេត្ត បានដឹកនាំផ្ទាល់រហូតឈានទៅឃាត់ខ្លួន ជនល្មើសបានចំនួន២នាក់ ក្នុងចំណោមបក្ខពួក៣នាក់ ដកហូតអាវុធAK ស្វ័យបត់មួយដើម មានគ្រាប់៧គ្រាប់ ។
សមត្ថកិច្ច បានឲ្យដឹងថា ជនល្មើសដែលឃាត់ខ្លួនទាំង២នាក់ ទី១. អ៊ុក មឿន ភេទប្រុសអាយុ៤០ ឆ្នាំ មានទីលំនៅភូមិត្រពាំងត្នោត ឃុំដំបូកខ្ពស់ និងទី២. ឈ្មោះ មួង រ៉េត ភេទប្រុស អាយុ៥៣ ឆ្នាំ មានទីលំនៅភូមិដងទង់ ឃុំដំបូកខ្ពស់ ស្រុកអង្គរជ័យដូចគ្នា។
លោកបន្តទៀតថា ជនល្មើសទាំង២នាក់ សមត្ថកិច្ចកំពុងធ្វើការសាកសួរដើម្បីស្វែងជ្រាវរកព័ត៌មានជុំវិញសកម្មភាពប្លន់ ក្នុងស្រុកទាំងបី នៃខេត្តកំពត មិនទាន់ដឹងថា ធ្វើសកម្មភាព ប៉ុន្មានលើក ហើយកន្លែងណាខ្លះ។ ពេលនេះសមត្ថកិច្ចកំពុងធ្វើការ សាកសួរបន្តនៅស្នងការដ្ឋាននគរបាលខេត្ត ។
សូមបញ្ជាក់ ក្រុមចោរប្លន់ប្រដាប់អាវុធនេះ ធ្វើសកម្មភាព បីស្រុក ប្រចាំខេត្តកំពត គឺ ស្រុកអង្គរជ័យ ស្រុកឈូក និង ស្រុកដងទង់ ដែលមានបក្ខពួកចំនួន៣នាក់ ជាក់ស្ដែងសមត្ថកិច្ចឃាត់ខ្លួន បានពីរនាក់ បក្ខពួកជនល្មើសម្នាក់ទៀត កំពុងរត់គេចខ្លួន ៕
មតិយោបល់