បន្ទាយមានជ័យៈ វាពិតជាសាហាវខ្លាំងណាស់ ដែលកូនសម័យនេះហ៊ានលើកដៃកាប់ឪពុកបង្កើតខ្លួនព្រោះតែពាក្យស្តីបន្ទោសបន្តិចបន្តួចនោះ។

ជាក់ស្តែងណាស់នៅ ព្រឹក នៅថ្ងៃទី២៥ ខែ មេសា ឆ្នាំ២០១៧ម្សិលមិញនេះ នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត មានកូនប្រុសចិត្តតិរច្ឆានម្នាក់ បានយកកាំបិតបុង័តោ កាប់លើប្រហារឪពុកខ្លួនឯងចំនួន៤កាំបិត បណ្តាលឲ្យរងរបួសធ្ងន់ គ្រាដែលឪពុកប្រមឹកម្នាក់នោះ មកពីផឹកហើយស្តីបន្ទោសលើខ្លួនខ្លាំងៗពីការមិនចេះរកស៊ី មិនរកការងារធ្វើ។

បន្ទាប់ពីកើតហេតុភ្លាមនោះ កម្លាំងជំនាញអាវុធហត្ថក្រុងប៉ោយប៉ែតបាន ចុះឃាត់ខ្លួនកូនជាជនដៃដល់ភ្លាមៗ និងដឹកបញ្ជូនជនរងគ្រោះទៅកាន់មន្ទីរពេទ្យបង្អែកក្រុងដើម្បីសង្គ្រោះបន្ទាន់។

សមត្ថកិច្ចបានប្រាប់អង្គភាព Post News ថា បើយោងតាមសម្តីជនដៃដល់ជាកូនឈ្មោះ កន សន អាយុ២៩ឆ្នាំ បានសារភាពថា នៅមុនពេលកើតហេតុ គឺឪពុកឈ្មោះ កន ម៉ៃ អាយុ៦២ឆ្នាំ បានវិលត្រឡប់មកពីផឹកវិញ ហើយក៏បានស្តីបន្ទោសលើខ្លួនថាមិនចេះរកស៊ី មិនទៅរកការងារធ្វើដេកចាំតែស៊ី ហើយការស្តីបន្ទោសនេះដដែលៗធ្វើឲ្យគេធុញក៏តមាត់ គាត់ក៏ទាញពូថៅគប់មកលើខ្លួន ដោយខឹងពេកខ្លួនក៏ទាញកាំបិតស្ទុះទៅកាប់វិញត្រូវចំក្បាលចំនួន១កំបិត ថ្ងាស់១កាំបិត ថ្ពាល់១កាំបិតនិង ចិញ្ចើម១កាំបិតបែបនេះតែម្តង ។

បច្ចុប្បន្នសមត្ថកិច្ចជំនាញអាវុធហត្ថក្រុងប៉ោយប៉ែតកំពុងតែកសាងសំណុំរឿងបញ្ជូនមកកាន់សាលាដំបូងខេត្តដើម្បីចាត់ការតាមនីតិវិធីច្បាប់៕