ព័ត៌មានជាតិ

អស់លក្ខ័! ឆក់កាបូបស្ត្រីកំពុងជិះម៉ូតូឌុបម្នាក់បានហើយ បែរមិនផុតក្រញ៉ាំសមត្ថកិច្ចដេញតាំងពីខណ្ឌចំការមន ដល់ខណ្ឌ៧មករា

ភ្នំពេញ: សមត្ថកិច្ចប៉ុស្តិ៍នគរបាលទំនប់ទឹក បានធ្វើការដេញប្រមាញ់ ជនសង្ស័យ២នាក់ ដែលបានជិះម៉ូតូធ្វើសកម្មភាពឆក់កាបូបពីស្រ្ដីម្នាក់ ដែលកំពុងជិះម៉ូតូឌុបនៅតាមផ្លូវបានសម្រេច រួចព្យាយាមជិះម៉ូតូគេចខ្លូន តែត្រូវសមត្ថកិច្ចដេញតាមប្រផាប់ចាប់ប្រភីង តាំងពីខណ្ឌចំកាមនរហូតមកដល់ខណ្ឌ៧មករា ក្បែរផ្សារអូឬស្សី ទើបសមត្ថកិច្ចចាប់ខ្លួនបានម្នាក់និងម៉ូតូ។ ចំណែកបក្ខពួកជនសង្ស័យម្នាក់ទៀតបានរត់គេចខ្លួនបាត់។

ហេតុការណ៍នេះបានកើតឡើងកាលពីវេលាម៉ោង៤ និង៣០នាទីទៀបភ្លឺ ថ្ងៃទី២៧ ខែមេសា ឆ្នាំ២០១៧ ត្រង់ចំណុចក្រោយសណ្ឋាគារ អិន.ឌឹក.ខន តាមបណ្ដោយផ្លូវលេខ៤៣០ ស្ថិតក្នុងសង្កាត់ទំនប់ទឹក ខណ្ឌចម្ការមន រាជធានីភ្នំពេញ។

សមត្ថកិច្ចដែលចូលរួមក្នុងប្រតិបត្តិការដេញបង្ក្រាបក្រុមជនសង្ស័យខាងលើ បានប្រាប់ភ្នាក់ងារ Post Newsថា មុនពេលកើតហេតុ កម្លាំងរបស់លោក បានកំពុងជិះល្បាតតាមមូលដ្ឋាន ក៏ប្រទះឃើញជនរងគ្រោះជិះម៉ូតូយ៉ាងលឿន ហើយស្រែកខ្លាំងៗ ថាចោរឆក់ៗ ហើយពេលនោះកម្លាំងនោះបានឃើញ ជនសង្ស័យ២នាក់ ជិះម៉ូតូមួយគ្រឿងម៉ាកស៊ុយសាគីនិច ពណ៌ខ្មៅលាយស គ្មានស្លាកលេខ មួយគ្រឿង ព្យាយាមជិះគេចយ៉ាងលឿនពីកន្លែងកើតហេតុ ។ឃើញដូចនោះ សមត្ថកិច្ចក៏បានជិះម៉ូតូដេញតាមជនសង្ស័យរហូតពីចំណុចកើតហេតុមកដល់ចំណុចផ្លូវលេខ១៦៦ក្នុងសង្កាត់អូរឬស្សី៤ ខណ្ឌ៧មករា ក្បែរផ្សារអូឬស្សី ក៏អ្នកផ្ញើរម៉ូតូម្តុំឃើញសមត្ថកិច្ចកំពុងដេញតាមជនសង្ស័យ គេក៏ទាញរបស់ម្យ៉ាង ទៅរុញឲ្យទៅបុកម៉ូតូជនសង្ស័យដែលកំពុងជិះនោះឲ្យដួល។ ភ្លាមៗនោះជនសង្ស័យទាំងពីរបានព្យាយាមរត់ទៅលើផ្ទះប្រជាពលរដ្ឋ តែត្រូវសមត្ថកិច្ចដេញចាប់បានម្នាក់ ចំណែកម្នាក់ទៀតគេចខ្លួនបាត់ស្រមោល។

ក្រោយកើតហេតុសមត្ថកិច្ចបានយកនាំជនសង្ស័យដែលឃាត់បាន មកសាកសួរ ដឹងថា ជនសង្ស័មានឈ្មោះ អៀម សុខបារាំង ជនជាតិវៀតណាម អាយុ២២ឆ្នាំ មុខរបរមិនប្រាដក ស្នាក់នៅផ្ទះជួលនៅក្បែរផ្សារអូរឬស្សី ដកហូតបានម៉ូតូមួយគ្រឿងម៉ាកស៊ុយសាគីនិចមួយគ្រឿងផងដែរ។ ចំណែកបក្ខពួកដែលគេចខ្លួនបាត់មានឈ្មោះ អាយ៉ា។

បច្ចុប្បន្នជនសង្ស័យខាងលើ ត្រូវបានសមត្ថកិច្ចសាកសួរ និងកសាងសំណុំរឿងបញ្ជូនខ្លួនទៅកាន់តុលាការចាត់ការតាមផ្លូវច្បាប់៕

មតិយោបល់