ភ្នំពេញ: នារីម្នាក់ ជិះម៉ូតូតាមដងផ្លូវ ត្រូវបានជនសង្ស័យមួយក្រុមមានគ្នា ៣នាក់ ជិះម៉ូតូ២គ្រឿង បើកតាមពីក្រោយធ្វើសកម្មភាពឆក់កាបូបស្ពាយបានសម្រេច តែត្រូវនារីរងគ្រោះ ស្រែកឆោរឡោដេញចាប់ខ្លួនបានម្នាក់។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង១១និង៤០នាទីយប់ ថ្ងៃទី២៨ ខែមេសា ឆ្នាំ២០១៧ ស្ថិតនៅចំណុចមុខក្រសួងដែនដី នគររូបនីយកម្មនិងសំណង់ ដែលមានទីតាំងនៅតាមបណ្តោយផ្លូវព្រះមុនីវង្ស សង្កាត់បឹងត្របែក ខណ្ឌចម្ការមន រាជធានីភ្នំពេញ។

នារីរងគ្រោះខាងលើមានឈ្មោះ រី សុភ័ក្រ អាយុ២៣ឆ្នាំ ស្នាក់នៅផ្ទះភូមិព្រែកកំពឹស សង្កាត់ព្រែកកំពឹស ខណ្ឌដង្កោ ។ ចំពោះសម្ភារ:ដែលបាត់បង់ទៅរួមមាន ទូរសព្ទដៃម៉ាក IPhone 6 មួយគ្រឿង និងលុយ៨ដុល្លារ។ ចំណែកជនសង្ស័យមានឈ្មោះ ឆាម សុផាណែត អាយុ១៩ឆ្នាំ ស្នាក់នៅម្តុំបុប្ផាជាយដែន សង្កាត់ផ្សារដើមថ្កូវ ខណ្ឌចម្ការមន។

តាមសម្តីរបស់នារីរងគ្រោះបានឲ្យដឹងថា មុនពេលកើតហេតុរូបនាងទើបនឹងមកពីជួបជុំជាមួយមិត្តភក្តិ។ លុះជិតដល់ម៉ោងកើតហេតុ រូបនាង បានជិះម៉ូតូ១គ្រឿងម៉ាក Zoomer-X ពាក់ស្លាកលេខ ភ្នំពេញ 1FN -3165 ធ្វើដំណើរតាមបណ្តោយផ្លូវព្រះមុនីវង្ស មកដល់មុខក្រសួងដែនដីនគរូបនីយកម្ម និងសំណង់ ក៏មានជនសង្ស័យ៣នាក់ ជិះម៉ូតូ២គ្រឿង រួមមានម៉ាក ស្មាស់វី ពណ៌ខ្មៅ ពាក់ស្លាកលេខ 1FB-4209 ជិះគ្នា២នាក់ និង១គ្រឿងទៀត ម៉ាក អាយខុន ពណ៌ខ្មៅលាយ ក្រហម ពាក់ស្លាកលេខ 1AC-3808 ជិះម្នាក់ឯង ជាអ្នកបិតគូទ បានតាមនាងពីក្រោយមកធ្វើសកម្មភាពលូកដៃឆក់កាបូបដែលនាងស្ពាយនៅនឹងខ្លួន បណ្តាលឲ្យរូបនាងដួលម៉ូតូយ៉ាងច្រញ៉ាប់ច្រញឹលរងរបួសរលាត់ដៃរលាត់ជើង ហើយនាងបានស្រែកឆោឡោបង្កឲ្យមានការភ្ញាក់ផ្អើលឡើងតែម្តង។

ភ្លាមៗនោះក៏មានប្រជាពលរដ្ឋចិត្តល្អ ឃើញហេតុការណ៍ដេញតាមស្រែកថាចោរៗតាមពីក្រោយរហូតមកដល់ផ្លូវ៩៥ ក្រោយក្រសួងដែនដី ដោយជនសង្ស័យភ័យនឹងគេដេញតាមពីក្រោយ ក៏ជិះម៉ូតូលឿនធ្លាក់ជង្ហុកបណ្តាលឲ្យដួលម៉ូតូទាំង២គ្រឿងរបស់ជនសង្ស័យ បន្ទាប់មកជនសង្ស័យ២នាក់ដែលជិះម៉ូតូស្មាស់វី បានប្រញាប់ងើបរត់យកទាំងកាបូបរបស់នារីរងគ្រោះទៅបាត់ដោយសុវត្ថិភាព។ ចំណែកជនសង្ស័យដែលជាអ្នកបិទគូទវិញដួលងើបមិនទាន់ រួចក៏ត្រូវប្រជាពលរដ្ឋព័ទ្ធចាប់បានស្វាគមន៍យ៉ាងចាស់ដៃ ទើបហៅសមត្ថកិច្ចមកនាំខ្លួនមកទៅប៉ុស្តិ៍បឹងត្របែកសួរនាំ រួមនឹងម៉ូតូ២គ្រឿងរបស់ជនសង្ស័យដែលដួលយកមករក្សាទុកនៅប៉ុស្តិ៍ផងដែរ។

ក្រោយកើតហេតុសមត្ថកិច្ចបានឌុបនារីរងគ្រោះមកកាន់ប៉ុស្តិ៍នគរបាលបឹងត្របែកដើម្បីដាក់ពាក្យបណ្តឹង ចាត់ការទៅលើជនសង្ស័យតាមនីតិវិធី និងតាមកំណត់មុខសញ្ញារបស់បក្ខពួកដែលរត់គេចខ្លួននោះបន្ថែមទៀត៕