ព័ត៌មានជាតិ

Update៖ រថយន្ត២គ្រឿងបុកគ្នាពេញទំហឹង បណ្តាលឲ្យមនុស្ស២នាក់របួសធ្ងន់!

ភ្នំពេញ: គ្រោះថ្នាក់ចរាចរណ៍ដ៏រន្ធត់មួយបានកើតឡើងរវាងរថយន្តហ៊ីយ៉ាន់ដាយដឹកដែក១គ្រឿង បានបុកគ្នាជាមួយរថយន្តម៉ាកកាមរីបាឡែន១គ្រឿងទៀតពេញទំហឹង បណ្ដាលឲ្យរងការខូចខាតយ៉ាងដំណំទាំងស្រុងដូចគ្នា ហើយខណ:នោះអ្នកបើកបររថយន្តកូរ៉េដឹកដែកបានរងរបួសធ្ងន់ ដោយបានគៀបជាប់និងកាប៊ីនបានបញ្ជូនទៅសង្គ្រោះបន្ទាន់ដល់មន្ទីរពេទ្យព្រះកុសុម: ហៅមន្ទីពេទ្យលោកសង្ឃ រីឯព្រូបានរងរបួសធ្ងន់ធ្ងរ និងត្រូវបានគេបញ្ជូនទៅសង្គ្រោះបន្ទាន់នៅគ្លីនិកឯកជនរស្មីសួរគ៌ា ស្ថិតនៅក្នុងសង្កាត់ស្ទឹងមានជ័យ ខណ្ឌមានជ័យ ដោយឡែកអ្នកបើកបរនិងអ្នកជិះនៅក្នុង រថយន្តកាមរីបាឡែន មិនបានរងរបួសនោះឡើយ ព្រោះបានពោងសុវត្ថិភាពផ្ទុះការពារ។

ហេតុការណ៍គ្រោះថ្នាក់ចរាចរណ៍បានកើតឡើងកាលពីវេលាម៉ោង៥និង៣០នាទីព្រឹកថ្ងៃទី២៩ ខែមេសា ឆ្នាំ២០១៧ នៅលើកំណាត់ផ្លូវជាតិលេខ៣ ត្រង់ចំណុចខាងត្បូងវត្តស្លែង ស្ថិតនៅក្នុងភូមិទឹកថ្លា សង្កាត់ក្រាំងពង្រខណ្ឌដង្កោ រាជធានីភ្នំពេញ។

តាមប្រភពព័ត៌មានបានឲ្យដឹងថា រថយន្តដែលបានបើកបុកគ្នានោះ១គ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ2H-3361 ដឹកដែក ហើយបុរសអ្នកបើកបរនិងព្រូមិនត្រូវបានគេស្គាល់ឈ្មោះនៅឡើយទេ រថយន្តនេះបានបើកបុកគ្នាជាមួយរថយន្ត១គ្រឿងទៀត ម៉ាកកាមរីបាឡែន ពណ៌ខ្មៅ ពាក់ស្លាក លេខ ភ្នំពេញ 2I-1166 បើកបរដោយនារីម្នាក់មិនស្គាល់ឈ្មោះ។

រថយន្តទាំង២គ្រឿងនោះបានរងការខូចខាតខ្ទេចផ្នែកខាងមុខទាំងស្រុងដូចគ្នា ហើយក្រោយពេលកើតហេតុ ក្រុមសង្គ្រោះអង្គភាព៧១១ របស់កងពលតូច លេខ៧០ បានដឹកអ្នកបើកបររថយន្តកូរ៉េទៅសង្គ្រោះបន្ទាន់នៅមន្ទីរពេទ្យព្រះកុសុម:។ ចំណែកព្រូត្រូវបានបញ្ជូនទៅសង្គ្រោះនៅគ្លីនិកឯកជន ចំណែករថយន្តទាំង២គ្រឿងត្រូវបានក្រុមសង្គ្រោះខាងលើស្ទូចចេញពីកន្លែងកើតហេតុ បញ្ចៀសការកកស្ទះចរាចរនៅលើកំណាត់ផ្លូវនោះ។

ប្រភពដដែលបានបន្តថា មុនពេលកើតហេតុ រថយន្តទាំង២គ្រឿងនោះបានបើកបរបញ្ច្រាសទិសគ្នា ដោយរថយន្តម៉ាកហ៊ីយ៉ាន់ដាយដឹកដែក បានបើកបរធ្វើដំណើរក្នុងទិសដៅពីជើងទៅត្បូង ចំណែកឯរថយន្តម៉ាកកាមរីបាឡែនបានបើកបរធ្វើដំណើរក្នុងទិសដីពីត្បូងទៅជើងក្នុងល្បឿនលឿនដូចគ្នា លុះដល់ចំណុចកើតហេតុ មិនដឹងថាមានបញ្ហាអ្វីទេទើបបុកគ្នាពេញទំហឹងបណ្ដាលឲ្យមានគ្រោះថ្នាក់បែបនេះតែម្ដង។

ក្រោយពេលកើតហេតុ នគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញបានចុះទៅធ្វើការវាស់វែង និងនាំយករថយន្តទាំង២គ្រឿងទៅរក្សាទុករង់ចាំការដោះស្រាយគ្នានៅពេលក្រោយ៕

មតិយោបល់