ព័ត៌មានជាតិ

រន្ធត់!កាមរីបាឡែនបុកម៉ូតូសង់ពេញទំហឹងលាន់ដូចរន្ទះ បណ្តាលឲ្យបុរសម្នាក់ផ្លោងស្លាប់មួយរំពេច!

កណ្តាល: ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើង បន្ទាប់ពីមានរថយន្តម៉ាកកាមរីបាឡែនមួយគ្រឿង បើកបរក្នុងល្បឿនលឿនទៅបុកម៉ូតូសង់ ដែលកំពុងជិះបញ្ច្រាសគ្នាក្នុងល្បឿនលឿនដូចគ្នាពេញទំហឹង បណ្តាលឲ្យបុរសម្នាក់ផ្លោងស្លាប់យ៉ាងរន្ធត់។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងប្រហែល២យប់ ថ្ងៃទី៣០ ខែមេសា ឆ្នាំ២០១៧ ស្ថិតនៅចំណុចចន្លោះគីឡូម៉ែត្រលេខ២៩/៣០ផ្លូវជាតិលេខ៣ ភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល។

ប្រភពព័ត៌មានពីសមត្ថកិច្ចបានឲ្យដឹងថា គ្រោះថ្នាក់ចរាចរណ៍ខាងលើនេះ បង្កឡើងដោយរថយន្តម៉ាកកាមរីបាឡែន ពាក់ស្លាកលេខ 2AD-9552 អ្នកបើកបរគេចខ្លួនបាត់ បានបើកក្នុងល្បឿនលឿន ជ្រុលទៅបុកម៉ូតូរងគ្រោះ ម៉ាកសង់ស៊េរីឆ្នាំ២០០៨ គ្មានស្លាកលេខ ដែលកំពុងបើកបរក្នុងទិសដៅបញ្ច្រាសទិសគ្នាពេញទំហឹង បណ្តាលឲ្យអ្នកបើកបរម៉ូតូស្លាប់ភ្លាមៗនៅកន្លែងកើតហេតុយ៉ាងអាណោចអាធ័មតែម្តង។

ក្រោយកើតហេតុ សមត្ថកិច្ចបានចុះមកធ្វើការវាស់វែង ស្រាវជ្រាវរកក្រុមគ្រួសារសព និងនាំយកមធ្យោបាយធ្វើដំណើរទាំង២គ្រឿងយកទៅរក្សាទុកនៅអធិការដ្ឋាននគរបាលស្រុក រង់ចាំធ្វើការស្រាវជ្រាវរកម្ចាស់មកដោះស្រាយគ្នាតាមផ្លូវច្បាប់បន្តទៀត៕

មតិយោបល់