ភ្នំពេញៈ សមត្ថកិច្ចនគរបាលខណ្ឌមានជ័យ ធ្វើការឃាត់ខ្លួនជនសង្ស័យ២ ជិះម៉ូតូម៉ាកសង់កូរ៉េ ដោយមានការសង្ស័យ ទើបដេញតាមសួរ តែជនសង្ស័យខាងលើភ័យ បានបើករត់រហូតដេញចាប់បានមកវិញ។

ហេតុការណ៍នេះកើតឡើងកាលពីវេលាម៉ោង១១ និង១០នាទីថ្ងៃត្រង់ទី២ ខែមេសា ឆ្នាំ២០១៧ ស្ថិតនៅក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទាំង២នាក់ ដែលចាប់ខ្លួនបានខាងលើនេះ ទី១មានឈ្មោះ បូរ បញ្ញា ភេទប្រុស អាយុ១៧ឆ្នាំ មុខរបរសិស្សនៅសាលាគោកបញ្ជាន់ស្នាក់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅខេត្តព្រៃវែង និងជនសង្ស័យទី២ឈ្មោះ សាន់ សុខា ភេទប្រុស អាយុ៣០ឆ្នាំ មុនរបរអ្នកលក់បង្អែម ស្នាក់នៅសង្កាត់បឹងទំពុន ខណ្ឌមានជ័យ មានស្រុកកំណើតភូមិបាធាយ ឃុំបាធាយ ស្រុកបាធាយ ខេត្តកំពង់ចាម។

មុនពេលកើតហេតុ ដោយមានកម្លាំងនគរបាលខណ្ឌមានជ័យ បានដឹកនាំកម្លាំងចុះល្បាតនៅក្នុងមូលដ្ឋាន លុះដល់ចំណុចស្ពានទី៣ ក្នុងភូមិចម្រើនផល សង្កាត់បឹងទំពុន ក៏ឃើញជនសង្ស័យ២នាក់ ជិះម៉ូតូមួយគ្រឿងម៉ាកសង់កូរ៉េ ពណ៌ក្រហម មានស្លាកលេខ ភព (ឃ)២២៨៦ បានហៅសួរ តែមិនព្រមឈប់ កម្លាំងសមត្ថកិច្ចបានដេញតាមរហូតមកដល់ចំណុចកើតហេតុខាងលើ ទើបចាប់បានយកមកប៉ុស្តិ៍ដើម្បីសាកសួរ។

នៅចំពោះមុខសមត្ថកិច្ចជនសង្ស័យទាំង២នាក់ បានសារភាពថា ដោយនៅក្នុងខ្លួនមានថ្នាំញៀនជាប់នឹងដៃ ទើបពួកគេបានឃើញសមត្ថកិច្ច ក៏ភ័យបានជិះម៉ូតូរត់គេចខ្លួន តែក៏ត្រូវសមត្ថកិច្ចដេញតាមចាប់ទាន់រហូតធ្វើឲ្យម៉ូតូរបស់ពួកគេជ្រុលទៅបុកជាមួយនឹងម៉ូតូសមត្ថកិច្ច ក៏បណ្តាលឲ្យដួលទើប សមត្ថកិច្ចចាប់បានតែម្តង ចំណែកថ្នាំញៀនវិញរូបគេបានបោះចោលបាត់ហើយ។

បច្ចុប្បន្នជនសង្ស័យខាងលើ កំពុងតែសាកសួរនៅប៉ុស្តិ៍ស្ទឹងមានជ័យ តែដោយកើតហេតុនៅខាងដឹកដីបឹងទំពុន សមត្ថកិច្ចបានកសាងសំណុំរឿង ប្រគល់ទៅឲ្យនគរបាលប៉ុស្តិ៍បឹងទំពុនវិញ ដើម្បីចាត់ការបន្តតាមផ្លូវច្បាប់៕

https://youtu.be/rUQhGGXBzLI