កណ្តាលៈ ជនសង្ស័យម្នាក់ ត្រូវបានសមត្ថកិច្ចធ្វើការចាប់ខ្លួន ខណៈកំពុងធ្វើសកម្មភាពជួញដូរគ្រឿងញៀនខុសច្បាប់។

ប្រតិបត្តិការនេះបានធ្វើឡើងកាលពីវេលាម៉ោង១០និង១៥នាទី ព្រឹកថ្ងៃទី២ ខែឧសភា ឆ្នាំ២០១៧ ស្ថិតនៅចំណុចភូមិម្លូម៉ីន ឃុំផ្សារដែក ស្រុកពញាឭ ខេត្តកណ្តាល ។

ជជនសង្ស័យដែលចាប់ខ្លួនបាន មានឈ្មោះ ក្រិត សុភ័ក្រ (ហៅបឿក) ភេទប្រុស អាយុ១៧ឆ្នាំ មុខរបរកម្មករសំណង់ ទីលំនៅភូមិកើតហេតុខាងលើ ចំណែកបក្ខពួកម្នាក់ទៀត បានរត់គេចខ្លួនបាត់ស្រមោល។

ក្នុងនោះដែរ សមត្ថកិច្ចធ្វើការដកហូតបាន ម្សៅក្រាមពណ៌សថ្លាមេតំហ្វេមីន ម៉ាទឹកកក ICE សង្ស័យជាសារធាតុញៀនចំនួន៧កញ្ចប់តូច,ដាវ២ និងឧបករណ៍វេចខ្ចប់ប្រើប្រាស់មួយចំនួន ។

មុននឹងឈានដល់ការចាប់ខ្លួនបានជនសង្ស័យខាងលើ កម្លាំងផ្នែកជំនាញ និងកម្លាំងប៉ុស្តិ៍បានទទួលព័ត៌មានពីប្រជាពលរដ្ឋថា មានជនសង្ស័យខាងលើកំពុងធ្វើសកម្មភាពជួញដូរថ្នាំញៀននៅចំណុចខាងលើ បន្ទាប់មកកម្លាំងសមត្ថកិច្ចបានចុះទៅបង្ក្រាបនិងឆែកឆេរបានវត្ថុតាងដូចខាងលើបញ្ជូនមកអធិការដ្ឋាននគរបាលស្រុកពញាឮ ដើម្បីបន្តសាកសួរចាត់ការតាមនីតិវិធីច្បាប់តែម្តង៕