ភ្នំពេញ: រថយន្តម៉ាកSsangyong ពណ៌ខ្មៅ ពាក់ស្លាកលេខរដ្ឋ១គ្រឿង បើកបុករថយន្តដឹកទឹកកកអនាម័យ១គ្រឿង បណ្តាលឲ្យខ្ទាតទៅបុកជញ្ជាំងប៉ាណូពិភពថ្មី រងការខូចខាត រីឯរថយន្តបង្ករងការខូចខាតយ៉ាងដំណំ។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងជាង៩ព្រឹក ថ្ងៃទី៣ ខែឧសភា ឆ្នាំ២០១៧ ស្ថិតតាមបណ្តោយផ្លូវបេតុង ចូលបុរីពិភពថ្មី ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
រថយន្តបង្កម៉ាកSsangyongពណ៌ខ្មៅពាក់ស្លាកលេខរដ្ឋ25 2-0423។ ចំណែករថយន្តដឹកទឹកកកអនាម័យប្រឡានកូរ៉េ ពណ៌ស ក្បាលពណ៌ខៀវ ពាក់ស្លាកលេខភ្នំពេញ2C-7835។

ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តSsangyongបើកបរក្នុងល្បឿនយ៉ាងលឿនទិសដៅពីត្បូងទៅជើងលុះមកដល់ចំណុចកើតហេតុ ក៏ទៅបុករថយន្តដឹកទឹកកកពេញទំហឹងពីក្រោយ បណ្តាលឲ្យរថយន្តដឹកទឹកកកអនាម័យ ខ្ទាតរេចង្កូតទៅបុកជញ្ជាំងប៉ាណូពិភពថ្មី រងកាខូចខាត រីឯរថយន្តបង្ករងការខូចខាតកំណាត់មុខយ៉ាងដំណំទៅមុខលែងរួច។

នៅក្នុងគ្រោះថ្នាក់ចរាចរណ៍នេះដែរគេសង្កេតឃើញប្រជាពលរដ្ឋហាក់មិនចង់និយាយអ្វីប្រាប់អ្នកសារព័ត៌មាននោះទេ។

ក្រោយពេលកើតហេតុ គេឃើញមានមនុស្សមកសណ្តោងយករថយន្តចេញពីកន្លែងកើតហេតុអស់ គេមិនដឹងថាភាគីទាំងសងខាងដោះស្រាយគ្នាដោយវិធីនោះទេ៕